UNANG MACTAN BRIDGE SIRHAN SA FLUVIAL

Gipahimangnuan ang tanang mga sakyanan nga motabok pagawas o pasulod sa Lapu-Lapu City atol sa fluvial procession karong Enero 20 nga adto moagi sa Marcelo Fernan Bridge.

Daghang karsada nga sirad-an sa dakbayan sa LapuLapu atol sa fluvial procession, sirad-an usab ang unang Mactan-Mandaue bridge sulod sa kapin sa usa ka oras karong Enero 20.

Matod sa pangulo sa City Traffic Management System (CTMS) Mario Napule nga ang taytayan sirad-an inig alas 2:30 sa kadlawon.

“Once masud na sa simbahan ang Santo Niño, amo na i-open ang bridge,” ni matod Napule.

Si Napule usa lang sa mga nitambong sa coordination meeting sa Lapu_Lapu City Hall niadtong Biyernes sa hapon kalabot sa nagsingabot nga Sinulog.

Paambit ni City Adminstrator Florito Pozon nga kontrolon unya nila ang mga modagsa nga mga deboto sud sa Nuestra Senyora Virgen dela Regla National Shrine nianang adlawa ilabi sud sa simbahan.

Si Nora Mangubat, representante sa simbahan, nagkanayon nga ang mga mosayo makalingkod sa sud ug di sila mosugot nga adunay magbarog sud sa simbahan kon mapuno na ang mga lingkuranan.

Ang mga di makalingkod, didto lang sa gawas sa simbahan pabarugon.

Gawas sa CTMS, gitambungan sab ang coordination meeting sa Lapu-Lapu City Police Office, Naval Forces Central, Vice Mayor's Office, City Tourism Office, Department of Education, City Disaster Risk Reduction and Management Office, City of Lapu-Lapu Allied Force, Philippine Red Cross ug City Public Information Office.