`NANGAWAT’ SA SUNOG GISIKOP SA SIKYU
Sukad sa 2015, ang Metro Retail Stores Group, Inc. (MRSGI) agresibo sa pagpalapad sa mga tindahan ngadto sa ubang mga dapit sa nasod.
Nagtinguha ang MRSGI nga makapatukod og sobra sa 100 ka mga tindahan sa 2020.
Sa kasamtangan, di mominos sa 52 ka mga tindahan ang gi-operate sa MRSGI ubos sa tulo ka retail formats – department store ubos sa brand name “Metro”; supermarket ubos sa “Metro Supermarket” ug Metro Fresh N Easy”; ug hypermarket ubos sa brand name “Super Metro”.
Ang nasunog nga Metro Ayala department store ug supermarket, ang usa sa laing dako nga outlets sa MRSGI nga gipanag-iya sa Gaisano.
Ang walo ka level nga tindahan nga natukod niadtong 1994, maoy ikatulo nga outlet nga nabuksan sa Vicsal Development Corp., ang ginikanan sa MRSGI, human sa Metro Colon (1982) sa kinapusurang bahin sa siyudad sa Sugbo ug Super Metro (1994) sa silingang dakbayan sa Mandaue.
Isip usa sa nag-unang mga tindahan sa Ayala Center Cebu mall sa Cebu Business Park, ang Metro Ayala nimarka sa unang mga ang-ang nga gibuhat sa Vicsal aron mamahimo nga world-class organization.
Ang maong tindahan gitawag nga labing dako ug labing maayo sa Vicsal.
Ang MRSGI, retail arm sa Vicsal, nahimo nga labing una nga Gaisano company ug labing una nga kompaniya nga nagbase sa Cebu sud sa usa ka dekada nga nalista sa Philippine Stock Exchange.
Sa wala pa ang debut niadtong Nobiyembre 24, 2015, ang MRSGI giila nga labing dako nga department store ug hypermarket operator sa Kabisay-an.
Ang MRSGI nigasto og P3.6 bilyones alang sa pagpalapad niini sa ubang mga lugar sa nasod.
Aduna kini mga sanga sa Metro Manila, Central Luzon ug Southern Luzon.
Sa unang siyam ka mga buwan sa 2017, mikabat og P550 milyones ang net profit sa MRSGI, doble sa ginansiya niini sa samang mga buwan sa 2016.
Samtang ang sales niini kay niabot og P24.4 bilyones, kun nitubo og 2.9 porsiyento sa 2016.
Si Frank Gaisano, chairman ug chief executive officer sa MRSGI, sa usa ka pamahayag, niila sa paglambo sa kompaniya gumikan sa “merchandising improvements and investments in operational efficiencies."