SEGURIDAD SA BASILICA

Gitutokan ang pagbantay sa kaluwasan sa Basilica Minore del Sto. Niño nga sentro sa kapistahan sa Sugbo karong Enero 21.

Gawas sa buhaton sa awtoridad, giawhag ang mga opisyal sama sa mga manindahay og mga buwak, kandila ug uban pa sa pagtabang og bantay sa seguridad sulod o gawas sa Basilica.

Sila giawhag sa Kagamhanan sa Dakbayan sa Sugbo nga magtinabangay aron paglikay sa kagubot ug ang paggiya sa ubang manindahay kon asa di pwede makapamaligya aron di makababag sa mga sidewalk aron maagian sa mga tawo.

Si Konsehal David “Dave” Tumulak niingon nga aron kini makahatag og kahigayonan sa mga manindahay usab nga makadali og sulod ug gawas sa simbahan.

Niuyon ang mga manindahay sa lagda nga gimando sa kagamhanan.

Karong tuiga, gibahinbahin ang mga responsibilidad, diin giapil ang mga opisyal ug mga asosasyon aron makapahapsay sa kapistahan ni Senior Santo Niño.

“As early as October, ato na ni silang gisultian ug hinaot nga hapsay na gyud ang umaabot nga kapistahan,” matod ni Tumulak.

Adto ibutang sa Barangay San Roque Sports Complex ang stocks sa mamindahay aron dil makaali sa sidewalk.

Gipaningkamotan nga ang dalan mamahimong libre aron sa pagpangamdam sa posibleng mahitabo hilabi na kung dunay emergency nga daling maka-access ang mga ambulansya, fire trucks ug kapulisan.

Si Genevieve Alcoseba, operations chief sa Division for the Welfare of the Urban Poor (DWUP), niingon nga giawhag ang tanang manidahay sa pagparehistro sa iyang buhatan.