Mga graduating student sa Education sa TCC mireklamo

Mga graduating student Talisay City College (|TCC) sa kursong education mireklamo nga hapit nalang mahuman ang klase apan hangtud karon wala pa gyud mapusli ang uniporme alang sa ilang sa practicum.

Ang mga tinun-an niingon nga gawas nga dugay kaayo nahuman bati usab kaayo og klase sa panapton ug desinyo.

Apan ang pangulo sa TCC lege nga si Ritchel Bacaltos mipasabot nga ang kadugay sa pagbayad sa mga tinun-an sa ilang unipormi maoy usa sa nakaingon sa pagkalangan.

Una niini ang mga tinun-an nga dili lang magpaila nipadayag sa ilang reklamo ngadto sa mga tigbalita nga gikolektahan silag tag P2 mil para sa ilang uniporme matag tinunan nga graduating.

Apan nahuman nalang ang tuig 2017 ug hapit nalang mahuman ang ilang klase wala pa gyud kini nila igkita ang practicum uniform.

Matod sa mga tinun-an nga sa dihang ila nang gipangita daghan og rason ang tunghaan usa na niini nga ilang gitarong sa pagtahi ang maong unipormi.

Sila miingon nga ang tinuod nga rason mao ang pagdaginot nila sa panapton tungod kay dili man mao ang ilang gituohan nga desinyo.

Iyang gitug-an nga dili lang sila magpaila tungod kay posible nga lisud-lisuron ilabi na nga mga opisyal sa TCC.

Si Bacaltos niingon nga nangayo na silag pasaylo sa mga tinun-an sa maong hitabo.

Apan iyang gipasabot nga ang 2 mil pesos alang na kini sa duha ka unipormi.

Samtang usa sa hinungdan nganong nalangan mao nga ang mga tinun-an nagpasukod sa unipormi apan wala pay gibayad gani nahuman ang buwan sa Oktobre 5 mil ra ang nakolekta sa motahi.

Hinungdan nga siya mismo ug ubang mga magtutudlo mitapal nalang aron mapalit ang panapton nga gikan pa sa kaulohan.

Iyang gibutyag nga nahuman na ang usa ka set sa unipormi og anaa na kini sa mga tinu-an apan aduna lay pipila nga nabalik tungod kay adunay mga usbonon.

Nagkanayon si Bacaltos nga inay itingob og hatag ang nahitabo nga kutob sa mahuman ihatag sa mga tinun-an bisan ug wala pa nakabayad.

“Ang nahitabo gud ana, sir, dunay nahuman nga uniform gihatag dayon sa estudyante bisa'g wala pa makabayad. Mao na ang mireklamo ana kadtong nakabayad na unya naawahi na hinuon,” matod ni Bacaltos.