PAPUTI SA KINATAWO NAUSO SA THAILAND
Nipagawas og pasidaan ang
public health ministry sa kagamhanan sa Thailand batok sa nauso ug bag-ong gikaboangan sa mga lalake sa nasod, ang magpaputi sa panit sa ilang kinatawo.
Sa taho sa The Telegraph, ang mga opisyal niawhag sa mga tawo nga hunahunaon makadaghan ka higayon sa dili pa mopaubos sa procedure kay magbilin kini og uwat sa kinatawo sa lalake ug manghubag.
Sa usa ka pamahayag, si Dr. Thongchai Keeratihuttayakorn sa health ministry, niingon nga dili mahinungdanon ang magpaputi sa kinatawo.
Siya nidugang nga pagusik-usik lang kini sa kwarta ug maghatag usab og daghan negatibo nga mga epekto inay ang mga positibo.
Ang pasidaan giluwatan sa public health ministry human nag-viral sa online ang video footage sa usa ka tambalanan nga nagpakita sa talagsaon nga
procedure nga gibuhat ngadto sa usa ka lalake nga gusto magpaputi sa panit sa iyang kinatawo.
Ang mga netizen nakugang sa pagkakita sa video.
Sa pagkutlo ning balita, ang
video kay gi-share ka 19,000 ka higayon na.
Ang tigpamaba sa tambalanan nitug-an sa BBC nga ang maong pamaagi sa pagpaputi nagbalor og $480 alang sa lima ka sessions.
Ang paagi kay bungkagon ang melanin sa panit gamit ang mga laser.
Si Popol Tansakul, marketing manager sa Lelux Hospital, nibutyag nga daghan sa ilang mga pasyente ang nagpakisusi sa maong medical procedure.
Matod niya, kadaghanan sa ilang mga pasyente kay mga mahuyang nga maayo moatiman sa pribadong bahin sa ilang lawas.
Si Popol nidugang nga kapin sa 100 ka mga lalake ang mobisita sa ilang tambalanan aron mopaubos sa maong procedure. /