Basin dunay kuwang

Kada tuig, dunay ipahigayong fire drill ang kabomberohan ingon man mga establisemento, labina sa highrise nga mga building. Kasagaran himuon kini sa Fire Month celebration sa Marso. Maayo ang pagbansay kay sama kini sa usa ka hinagiban nga kanunay gipahait. Mao nang magpangutana ang publiko atol sa sunog sa Metro Ayala Center Cebu, kon nganong naglisod ang kabomberohan sa pagkombate sa kayo.

Naa ba kahay igong mga ekipo ang kabomberohan nga magamit sa pagkombate sa kayo?

Di kini unang higayon nga nakaresponde ang mga bombero og samang alarma kay niadtong 2011, nasunog usab ang Gaisano South Capital sa dan Colon. Sa maong sunog, gipasagdan na lang sa kabomberohan nga maugdaw ang sulod niini.

Sukad niadto, nakat-on ba kaha og leksyon ang kabomberohan? Nakat-on ba kaha sila unsaon sa pagkombate ang sunog sa samang desinyo nga edipisyo ug naka-upgrade ba kaha sila sa ilang mga ekipo?

Ang mga establisemento sa patigayon, andam ba kaha sila sa sama ani nga emerhensya?

Panahon na karon nga ang kabomberohan ug mga patigayon molingkod alang sa pag-umol og lapad nga plano kalabot sa sunog.

Kon nakaumol og fire responders ang dagkong mga kompaniya, di kaha maayo nga magbutang sila og kaugalingon nga fire brigade nga kompleto sa kasangkapan sa pagtubag og dagkong sunog, di lang kay team lang nga ang gamit panggamay lang nga alarma sa kayo?

Di ikalimod nga ang Metro Cebu paspas kaayo nga milambo ning nanglabay nga katuigan, apan giubanan ba usab kaha kini sa mga pangandam nga haom sa panahon?

Bisan unsaon sa pagtan-aw, ang sunog sa Metro Ayala nagpakita sa mga kakuwangan nga angay susihon. Basin, ang pagpangandam wa matukma sa panahon.