My love is your love
Gipasagdan ko na lang si Mona nga naghilom. Nakahibawo ko nga si Ruben ang iyang gihunahuna. Tingali, maoy diha sa iyang hunahuna kon nganong di pa siya ang gihigugma ni Ruben? Malipayon unta siya karon. Di lang gyud nako kalikayan nga mobatig kaluoy kang Mona. Best friend kaayo nako siya. Grabe ang among kasuod.
Dug-ol ra man gud ang among balay. Sukad sa among pagka bata, kami lang duha ang kanunay magduwa. Sa among pag-eskuwela sa daycare hangtod sa paggradwar namo sa hayiskol, klasmet gyud mi.
Di gani unta nako sugton si Ruben apan kay love man gyud nako siya, wa ko makasupak sa pinitik sa akong kasingkasing.
“Kon mauyab ko si Ruben, Sandra, siya lang gyud ang laki nga akong higugmaon. Daghan ang nag-ingon nga wa nay forever love karong panahona. Pero supakon ko kini kay forever love gyud ang gibati ko kang Ruben.”
Nakapanghupaw ko dihang nahinumdom ko sa gisulti ni Mona nako sa adlaw sa among gradwasyon kaniadto sa hayiskol. Gipanghinaot ko sab kaniya nga matuman ang iyang gipangandoy bahin sa iyang lovelife. Apan naunsa ba nuon nga ako man ang gipangulitawhan ni Ruben?
Pagkanaog namo sa gisakyan namong dyip, wa gihapon magtingog si Mona samtang nanulod mi sa gate nga rehas sa subdivision nga dunay mga security guard. “Good night, Mona.” Gikuptan ko ang usa ka kamot sa akong best friend dihang nahiabot mi sa ilang balay. Una ang ilang balay kay sa among balay gikan sa gate sa subdivision. “Good night sab, Sandra.” Klaro nga way kadasig ang tingog ni Mona. Wa siyay lingi-lingi nga misulod sa ilang balay. Nakapanghupaw na sab ko dayon kong padayon paglakaw paingon sa among balay.
Wa pa matulog sila si Mama ug Papa kay sayo pa man ang gabii. Diha sila sa sala, nagtan-aw sa balita sa TV. Miamen ko nila.
“Dinhi si Ruben, Sandra. Pero kadali ra. Moadto kuno siya sa ilang Mona kay duna siyay tuyo ani.”
Nadiyong ang akong mga mata. Wa dayon ko makatubag sa gisulti ni Papa. Nakatan-aw ko niyag dugay nga igo lang mipasiplat nako ug mitan-aw na sa TV ug naminaw sa tigbalita. Si Ruben tua sa ilang Mona? Hilom kong nakaingon.