Nagkugi sa pagpanahi
Ako si Conchita Juntong, 44, taga Purok Kawayan, Tayud, Liloan Cebu, minyo ug adunay tulo ka mga anak nga nag-eskwela sa hayskol ug kolehiyo.
Aduna akoy negosyong tailoring shop nga maoy nakapalambo sa among kinabuhi karon. Nagsugod ang tanan niadtong nakasulod ko og trabaho sa usa pud ka tailoring shop diri sa among lugar.
Bisan gamay ra ang akong sweldo didto sa akong gitrabahoan, nakatabang kini sa among adlaw-adlaw nga pangkonsumo sa balay. Ang wala nako gidahom nga kadto mao sab diay ang magdala namo sa akong pamilya og medyo haruhay nga pagpuyo.
Tungod kay nabangkarota ang akong gitrabahoan nga tailoring shop, wala ko makadugay og trabaho didto. Ang mubo nga panahon nga nakatrabaho ko didto igo na hinoon nga nakat-on ko unsaon ang maayo nga pagtahi ug pagama og mga sanina.
Kay nahugno ang iyang negosyo, gipangbaligya sa tagiya ang mga makina nga pangtahi sa barato nga kantidad. Wala gyud ko magduhadu- ha og palit sa usa ka makina bisan gamay ra kaayo mi og kita sa akong bana.
Nagsugod ko og tahi-tahi sa among balay. Repair ra gyod to una akong gihimo kay lagi kulang pa ko sa materyales ug dili pa sad nako kaya nga motahi og binulto kay walay makatabang nako.
Tuig 2002, nakadungog ko sa Ramon Aboitiz Foundation Inc. (RAFI) Micro-finance, Inc. (RMF) pinaagi sa akong amiga. Iya ko gi-enganyo nga moapil sa maong programa kay aduna kiniy financial assistance ug aduna puy insurance.
Nagduha-duha ko sa sinugdanan pag-apil kay mahadlok ko basin dili ko makabayad. Pero wala ko nagpadala sa akong kahadlok ug niapil. Kaluoy sa Ginoo nakabayad ra gyud ko sa akong sinemanang bayranan. Nakapamatuod gyud ko nga basta gamiton lang gyud sa sakto ang kwarta nga hinulaman, wala gyud kay problemahon sa imong mga obligasyon.
Kay tarong ko mobayad, gipahulam pa gyud ko og dugang kapital nga akong gipalambo sa akong tailoring shop. Karon, aduna na koy unom ka mananahi nga nagtrabaho sa akoa. Nakapalit pud ko og dugang makina sa pagtahi, maong karon manahi na kami og binulto nga order sa uniporme alang sa mga kompaniya, ug manahi na pud mi karon og mga gowns.
Dako gyod sab ang akong pasalamat sa Ginoo kay gihatagan ko niya og mga buotan nga anak ug bana nga maoy nagsilbing inspirasyon nako kada adlaw. Nagpasalamat pud ko sa RMF kay ila gyud kong gihatagan og dugang puhunan. Apan akong masulti nga kawang ang puhunan kon dili magkugi ang tawo. Maong mosalig lang gyud sa kaugalingon nga makab-ot ra gyud ang atong mga pangandoy basta ubanan lang gyud sa kugi ug pagsalig sa Ginoo.