LeBron naapsan ni Antetotokounmpo

Dili si Cleveland Cavaliers superstar LeBron James ang nag-una sa padaghanay og boto sa labing unang update sa National Basketball Association (NBA) All-Star balloting kon dili ang pambato sa Milwaukee Bucks nga si Giannis Antetokounmpo.

Si Antetokounmpo nakahakot og 863,416 nga mga boto aron patigbabawan ang Eastern Conference ug overall human sa nag-unang 12 ka mga adlaw nga balloting.

Nabiyaan niya og 7,500 ka mga boto si James, kinsa naay 856,080 ka mga boto.

Naa sa ikatulo sa Eastern Conference ug overall mao ang ang lider sa Boston Celtics nga si Kyrie Irving, kinsa nakabaton og 802,834 ka mga boto.

Si Antetokounmpo, 23, naa sa ikaduha sa scoring leaders pinaagi sa iyang average nga 29.1 puntos ug nahilakip siya sa top 20 sa blocks, steals ug rebounds.

Sa Western Conference, nag-una ang mga pambato sa Golden State Warriors nga sila si Kevin Durant (767,402) ug Stephen Curry (735,115) unya nagsunod sila si Houston Rockets guard James Harden (602,040) ug Oklahoma City Thunder guard Russell Westbrook (438,469).

Sa bag-ong format sa AllStar, ang makakuha og labing daghang mga boto sa Eastern Conference ug Western Conference mao ang magsilbeng team captain sa ilang tagsatagsa ka grupo.

Ang starters sa matag grupo pilion pinaagi sa fan vote (50 percent), boto sa kasamtangang mga magduduwa (25 percent) ug media (25 percent).

Ang starters ibutyag karong Enero 18 samtang ang mga reserba sa Enero 23.

Ipahigayuon ang All-Star Game karong Pebrero 18 sa Staples Center sa Los Angeles.