Bypass roads buhaton sa Minglanilla

Duha ka mga barangay ang giila ni Minglanilla Mayor Elanito Peña diin maghuot ang dagan sa trapiko sa ilang lungsod.

Sumala sa mayor gumikan sa kadaghan sa mga eskina sa Lipata ug Pakigne diin duna usab mga subdivision, matrapik ang mga sakyanan nga mopadung sa habagatan.

Siya nisugyot nga mag-abli og bypass road gikan sa Barangay Pook, siyudad sa Talisay, sa daang railway ug mogawas sa dakbayan sa Naga agi sa Barangay Tungkil, Minglanilla.

Matod niya nga naapil na sa priority projects, ang paghimo sa bypass roads.

Si Peña nibutyag nga amendahan usab sa konseho sa ilang lungsod ang ilang Traffic Code pinaagi sa ipasar nga ordinansahon aron ma-clamp na sa mga traffic enforcer ang mga sakyanan nga ilegal nag-park sa national highway.

Mosud usab og kasabotan ang kagamhanan sa lungsod tali sa towing company aron ma-tow ang mga sakyanan nga ilegal nga nagparada sa nasudnong highway.

I-regulate na usab sa lungsod ang mga habalhabal ug trisikol nga modagan sa national highway.

“Mo-regulate sad gyud mi, di kaayo mi pataka og padagan diha sa national highway. Among plano diha mostly adto na sa mountain barangay ang habalhabal,” dugang ni Peña.

Si Gobernador Hilario Davide III mopatawag og laing tigom, ning higayona apil na ang mga opisyal gikan sa ubang mga LGU gikan sa dakbayan sa Danao hangtod sa siyudad sa Carcar kuyog ang Land Transportation Office, Highway Patrol Group, Cebu Provincial Police Office ug ubang stakeholders, aron solusyonan ang suliran sa dagan sa trapiko.

Niadtong Biyernes, gitigom sa gobernador ang mga opisyal sa Minglanilla ug Talisay aron pangitaan og solusyon ang suliran sa trapiko human sa pipila ka oras nga hinay nga pag-irog sa mga sakyanan nga nasinati sa mga motorista niadtong Disyembre 23.

Sa tigom, gisugyot ang paghimo og hiniusa nga Traffic Code sa Metro Cebu labi na kahimtang karon nga nagkadaghan ang mga sakyanan.

Apil sa natuki usab ang pag-umol og academy alang sa pagbansay sa mga traffic enforcer sa Metro Cebu alang sa maayong pagdumala sa trapiko ug retraining ug seminar sa LTO.