Davide midayeg ni Espino bisan sa mga pagsaway

“Maayo man siya, okay man siya.”

Kini ang paghulagway ni Gobernador Hilario Davide III kang Police Regional Office Director Jose Espino, kinsa gipasanginlan nga nagdawatan og protection money gikan sa mga gambling financier sa Metro Cebu.

Si Davide, chairman sa Regional Peace and Order Council (RPOC), nipasabot nga angay mamatud-an ang pasangil batok sa labing taas nga opisyal sa kapulisan sa Central Visayas.

Matod niya nga angay nga paabuton ang desisyon sa Regional Internal Affairs Service (RIAS) 7 bahin sa pasangil nga gipahid ngadto kang Espino.

“I think he is being investigated by the police. Let’s just wait, I don’t want to speculate. I don’t want also to judge RD Espino, he’s a police officer,” sumala sa gobernador.

Sa iyang personal nga kapasidad, way nadunggan si Davide bahin sa giingong nagdawatan og protection money si Espino gikan sa mga pinanser og sugal.

Ang pasangil namantala sa mga column ni Bobby Nalzaro nga nigawas niadtong Disyembre 23 ug Enero 3 sa Sun.Star Cebu diin gibase kini sa suwat nga nadawat sa kolumnista gikan sa nagpakabana nga lungsoranon nga nipasangil

nga si Espino nakigtigom sa mga gambling financier sa Metro Cebu duha ka semana human kini nilingkod sa puwesto ug giingong nangayo og P500,000 matag semana isip protection money.

Si Espino niasumir isip director sa PRO 7 niadtong Hulyo sa miaging tuig ug nimando sa iyang mga sakop nga kanunay mag-busy sa pagpanakop og mga kriminal,

drugs lords ug pushers.

Siya nihimakak sa pasangil batok niya ug nagtuo nga gibuhat kini aron pagdaot sa iyang liderato sa kapulisan sa rehiyon 7.

Si P/SSupt. Jose Carumba, hepe sa RIAS 7, nibutyag nga nagsugod na sila sa ilang validation base sa news clippings ug gitagsa-tagsa kini og susi.

Siya nidugang nga manginahanglan sila og testigo ug affidavit bahin sa pasangil.