50,200 mil ka drug surrenderees sa lalawigan sa Sugbo
Sa kapin 50,200 ka drug
surrenderees nga narehistro sa lalawigan sa Sugbo sa miaging tuig, 3,438 lang niini ang nakahuman sa community-based treatment program (CBTP) sa lainlaing barangay, sumala sa record sa Provincial Anti-Drug Abuse Office (Cpadao).
Si Carmen Remedios “Ivy” Durano-Meca, pangu sa Cpadao, niangkon nga wa sila magdahom nga 100 porsiyento sa drug surrenderees ng moapil ug mohuman sa CBTP sa Barangay Anti-Drug Abuse Councils (Badac).
Siya nipasabot nga dakong hagit sa mga barangay ug Philippine National Police ang pagkumbinser sa mga drug surrenderer nga motambong sa mga community based treatment program.
Matod niya nga 75 porsiyento lang ang labing taas nga porsiyento sa mga drug surrenderer nga motambong ug mo-graduate sa CBTP sa mga LGU.
Sumala ni Meca, 24 sa 50 ka mga local government unit nga sakop sa lalawigan, ang napahigayonan nila og seminar bahin sa framework sa Matrix Intensive Outpatient Program uban sa Department of Health (DOH).
Apan 17 lang niini ang dunay nagpadayon nga CBTP.
Kini naglangkob sa mga lungsod sa Sibonga, Argao, Boljoon, Oslob, Samboan, Barili, Pinamungajan, Santa Fe, San Remigio, Tabogon, Tabuelan, ug Carmen ug mga siyudad sa Carcar, Naga, Talisay, Bogo, ug Danao.
Sa record sa Cpadao, sa 5,588 ka drug surrenderers nga nagpa-enroll sa CBTP, 3,438 lang niini ang naka-graduate. Kini nagagikan sa Naga (18), Argao (569), Boljoon (54), Dalaguete (25), Oslob (180),
Bogo (628), Medellin (149), San Remigio (821), Carmen (550), Danao (30), Sogod (397) ug Carcar (17).
Ang MIOP maoy gigamit nga treatment program alang sa mga drug surrenderer, ug alcohol, smoking and substance involvement screening testbrief intervention (ASSIST-BI) isip assessment tool.
Si Meca niingon nga dunay mga barangay di aktibo sa CBTP kay way drug surrender apan ila kini gipatutok sa
demand reduction pinaagi sa
pagpahigayon og drug education prevention seminar.
Siya nidugang nga dili makapahigayon og CBTP ang barangay kon wala kini mapaubos sa seminar bahin sa MIOP sa DOH.
Si Meca niingon nga kinahanglang makiglambigit ang
faith-based organization nga dunay drug rehabilitation program sa Badac ug LGU.