TRAIN walay pulos?

Mas dako ang madala nga suweldo sa mga maapektohan sa bag-ong tax reform sa kagamhanan karong Enero 15, apan sa maong adlaw, ang oil companies gipaabot nga mopatuman sa one-time big-time nga umento sa presyo sa mga produkto sa petrolyo nga P3.00 tungod sa epekto sa samang bag-ong reporma sa buhis.

Dili ba ang nag-unang nagdektar sa presyo sa nanag-unang palaliton mao ang lana? Kon mahitabo nga dunay dakong umento sa presyo sa lana karong Enero 15, dili ba suyupon lang ang dakong madala nga suweldo sa mga trabahante sa pagtaas sa presyo sa palaliton? Mabutang nga walay pulos ang bag-ong tax reform. Nahisama sa giduwaan lang ang mga kabus nga kunohay ‘exempted sa buhis.’

Sa news forum sa Quezon City, si IBON Foundation executive director Sonny Africa niingon nga ang pangangkon sa Department of Finance (DOF) nga unom ngadto sa pito ka milyon ka Filipinos ang makabenepisyo sa income tax exemption usa ka ‘pagpangilad.’ Dugang ni Africa, ang labing kabus nga pamilya nga wala makabenepisyo niini human walay trabaho mas gihansakan pa sa taas nga indirect consumption taxes tungod sa pagmahal sa presyo sa palaliton ug serbisyo.

“Hindi dapat nila sinasabi na minimal o negligible o wala ‘yung epekto ng TRAIN (Tax Reform for Acceleration and Inclusion) sa presyo ng bilihin,” matod niya sa forum nga gikutlo sa taho sa GMA News Online, diin iyang gihimo nga sanglitanan ang pagtaas sa inflation rates ug commodity prices human sa oil tax adjustment sa 1996 ug expansion of value-added tax niadtong 2005.

Ang mga opisyal sa kagamhanan naglihaylihay sa pagtubag o mipakaubos sa epekto sa lana ngadto sa presyo sa nag-unang palaliton? Nisamot na nga ang deregulated ang industriya, ang mga langyaw kompaniya makapatuyang sa ilang gusto sa umento sa lana. Yawyaw ni Juan, ‘pagka walay pulos sa TRAIN.’