Mga mall sa Sugbo kinahanglan susihon

Sa isyu ning maong pamantalaan niadtong Disyembre 29, 2017, nakapangutana kita ning maong lindog kon luwas ba sa publiko ug sa mga kawani ang mokabat sa 50 ka mga mall sa tibuok lalawigan sa Sugbo, ilabi na ang mga higanteng mall sa syudad sa Sugbo.

Nakapangutana kita niini human sa pag-ulbo sa sunog sa usa ka mall sa syudad sa Davao niadtong Disyembre 23. Ang sunog sa New City Commeercial Center (NCCC) mall sa Davao nikalas og 38 ka mga kinabuhi, lakip sa 37 ka call center agents ug usa ka kawani sa mall.

Ang nahitabo sa Davao mahimong mahitabo dinhi sa Sugbo. Ug uho ra man, niulbo ang dakong sunog sa usa ka mall dinhi sa syudad niadtong Biyernes sa gabii. Apan ang nakaayo lang, sa kaluoy sa Kahitas-an, way bisan usa ka kinabuhi nga nakalas.

Hapit magkapupareho ang building sa mga mall. Pulos semento ang bungbong ug way mga bentana. Kon masunog, magpuot ang kayo ug aso sa sud sa building. Maglisod pagkontrolar sa sunog ang mga bombero ug sagad nga huwaton na lang nga maugdaw.

inahanglan pang lungagan ang kilid sa building aron makahungaw ang aso ug ang kainit nga maoy nakapugong sa mga bombero sa pagsud sa building. Si Supt. Rolando Orbeta, Bureau of Fire Protection (BFP) 7 assistant director for operations, niingon nga kining maong paagi gitawag og ventilation.

Ning maong paagi, makapasirit ang mga bombero og tubig gikan sa gawas sa building padung sa sud. Apan tungod sa kadako sa sunog sa Metro Ayala, hayan nga molungtad pa kini og pipila ka adlaw.

Gihulagway nga di usa ka ordinaryong sunog ang miuldo sa Metro Ayala sa alas 9:30 sa gabii niadtong Biyernes. Nahugno na ang pipila ka bahin sa building niini apan hangtod karon padayon pa ang kabomberohan sa pagkonbati sa kayo.

Si Supt. Orberta niingon nga way bombero nga gi-deploy sa sud sa building tungod kay ang temperatura o kainit sa sud, igo nang makalanay sa safety gear sa mga bombero sama sa ilang boots ug breathing apparatus.