Sayop nga pagtuo

Dear Papa Joe,

Tawga lang ko sa pangalan nga Barry, 30 years old, taga Danao City apan nia ko karon sa Singapore.

Ang akong suliran kabahin sa among relasyon sa akong asawa nga nagkadugay nagkabugnaw na. Nahibaw-an niya nga naa koy ka iring-iring diri sa Singapore ug ako nang giangkon niya dihang nagkaprangkahay mi. Ako siyang gisultihan sa rason kon nganong nabuhat ko kadto.

Ang rason mao nga niingon akong mga ginikanan nga naa siyay gikabuangan nga lalake nga kauban ra niya sa trabaho. Naabtan gyud daw ni mama nga gihatod siya sa balay dihang giuli ni niya ang akong anak nga gibilin sa akong asawa kon motrabaho. Unya naa pay higayon nga bugnaw na kaayo siya nako ug tagsa na lang mo-chat. Matod pa niya busy siya.

Bunga sa akong kapungot ug tentasyon mao nga nahilambigit sad ko og kauban diri. Pero ako dayon gibuwagan pero uwahi na kay nasayod na siya. Pero di motuo ang akong asawa nga nagbuwag mi. Ako siyang gisultihan nga siya ang gabinuang kay mismo ang akong mama nakakita niya nga gihatod siya og lalake.

Matod niya nga nag-uwan to mao napugos siya og sakay sa sakyanan kay kuhaon na niya ang bata kay late na kaayo siya. Gidaot lang daw siya ni Mama kay nasina ni nga niangat mi sa among pagkabutang ug wala sila mapiksi nga silay mga ginikanan. Pero ganahan na siya makigbuwag nako. Unsay angay nakong buhaton?

BARRY

Barry,

Mouli ka ug makigsulti ka niya og tarong. Panid-an nimo si Mama nimo ug asawa nimo kon kinsay nagsulti sa tinuod, ayaw sayanga ang panahon na pwede mabungkag sa sayop na pagtuo. Ikaw ray makahapsay ana. Pag-effort lang para mapamatud-an nimo nga nagbasol sad ka sa imong nabuhat. Pag-ampo kay basin pa diay mohapsay ang tanan.

PAPA JOE