My love is your love

Morag wa ko sa akong kaugalingon nga misulod sa akong kuwarto. Human ko makailis og para sa balay, wa dayon ko mogawas sa akong kuwarto aron manihapon. Mihigda ko sa akong kama. Nagliraw-liraw ang akong mga mata nga nagtan-aw sa kisame.

“Nganong tua man kaha si Ruben, no, sa ilang Mona? Unsa man kahay iyang tuyo kang Mona?

Wa man magsulti si Ruben nako ani?” Nakig-estorya ko sa akong kaugalingon.

Unya gipamatyag ko ang akong gibati. Nagselos ba ko? Apan nganong mangabubho man sab ko nga wa man mangulitawo si Ruben kang Mona? Duna lang gyud tingali laing tuyo ang akong boyfriend sa akong best friend.

Migawas ko sa akong kuwarto ug nanihapon ko. Ako ra ang mikaon kay nakahuman na mag panihapon sila si Mama ug Papa uban sa akong manghod. Nakakaon na man gani ang among katabang.

Apan wa ko ganahing mikaon. Di gyud mawala sa akong hunahuna si Ruben nga miadto sa ilang Mona.

Miundang kog kaon. Unya nananghid ko sa akong mga ginikanan nga magpahangin ko sa gawas. Igo lang mitando sila si Mama ug Papa.

Maoy akong plano nga moadto ko sa ilang Mona.

Nakahunong kog lakaw kay sa terrace sa ilang Mona, parehas ang among balay, two storey, nakita ko sila si Mona ug Ruben nga malipayong nag-estoryahay. Nadungog ko pa gani ang ilang mga katawa. Hayag ang terrace nila ni Mona. Nagtupad silag lingkod sa taas nga bangko. Usahay makita ko si Mona nga mohapak sa bukton ni Ruben. Ug ang akong boyfriend sab, usahay mokupot sa kamot ni Mona.

Mikusog ang akong pagginhwa. Wa ko makasabot sa akong kaugalingon niadtong tungora.

Morag gusto kong mohilak kay wa gyud nako kapugngi nga mibatig pangigi, nangabubho ko kang Mona.

Morag gusto sab kong maglagot sa akong best friend ug sa akong boyfriend.

Apan nakakontrol gihapon ko sa akong emosyon. Di ko angay hatagan og malisya ang akong nakita kang Mona ug kang Ruben. Dako ang pagsalig ko sa akong trato. Ug di sab makahimo sa pagtraydor si Mona nako kay grabe ang among pagka amiga. Aside from that, daan nang close sila si Ruben ug Mona sukad sa among high school days.

Mipauli na lang ko. (SUMPAYAN)