Ang magtiayon sa Yanawila

Nagkadusingot na si Abloy apan wa pa gihapon siya makakita og igong salapi nga sarang ikapatambal sa ilang anak. Taas kaayo ang hilanat niini ug gani kagabii pa kining nagsalimuang. Nakatuaw siya, “Pastilan! Pait gyud diay ning wa tay trabaho, way pagsalig sa atong kaugalingon.”

Nahinumdom siya sa nagtrabaho pa siya sa Atlas Mining sa Lutopan, Toledo kaniadto, abli ang tanang ganghaan sa mga tindahan alang kanila. Si Lingling, iyang asawa, niadtong tungora wa gayud batiag kalisod, kay lagi buhong man kini sa tanang gikinhanglan. Gawas sa suweldo nga iyang nadawat matag kinsena, dako usab ang makubra niya sa iyang obertayim.

Apan karon nga wa na siya magtrabaho sa Atlas Mining, tanang tindera og isda nagesnab na kanila. Gani kon masugatan niya sila sa dalan iyahay lag lingiw ug katibulaag, labi na kon utang na ang hisgutan.

“Dong, ta-ta-baaang!” singgit ni Lingling ngadtong Abloy nga naghinuktok nga nagtambo sa bentana sa taliis nga tingog. “Misulirap ang mga mata

ni Jiji!”

Nahaigking si Abloy sa iyang nahimutangan. “Unsa?”

“Tan-awa ang bata!” ni Lingling nga nagkurog. “Unsa man ganiy mahitabo sa bata, ayaw na pagdahom kanako. Maghikog gyud ko!” Midanguyngoy si Lingling.

Sa way paglangan daw kabayo nga miambak si Abloy sa tugkaran nga wa mag-agi sa hagdanan. Apan ingon sa way tumong ang iyang pagadulngan. Hangtod nahitangka siya sa dapit nga wa niya damha nga maabot. Diha na siya sa barangay Yanawila diin nahimutang ang balay sa magtiayong M’amJul ug Sir Zim, kinsa nabaniog sa lungsod nga mga maayong tawo.

“Abloy, unsay ato kanimo?” ni M’am Jul nga nahikurat sa kalit nga pagtungha si Abloy.

“Kuan, M’am, kuan...”tubag ni Abloy nga naghangos. “Si Jiji, akong anak, gihapuan sa hilanat!”

“Mao ba? Unya, unsa may among ikaalagad kanimo?” sagbat ni Sir Zim.

“Kon mahimo, mohulam unta ko kaninyo og kuwarta, M’am, Sir!”

“Kon mao na, aniay lima ka libo ka pesos. Dad-a dayon ang bata sa doktor,” ni Sir Zim nga mikuot sa bulsa sa iyang karsones.

Ingon sa nahuwasan sa kahingawa sa iyang anak si Abloy sa gipakitang talagsaong kinaiya sa magtiayon. Mipauli dayon siya sa ilang balay ug gidala nila ang bata sa District Hospital sa lungsod. Gitagalan og pipila ka oras ang bata tungod sa kagrabe na sa hilanat niini.

Salamat sa Kahitas-an ug ubos sa paningkamot sa mga mananambal ug pagdapat sa tukmang tambal naluwas ang kinabuhi sa ilang anak. Dinhi nahimugso sa kasingkasing ni Abloy ang dakong pagpasalamat sa magtiayong M’am Jul ug Sir Zim nga nagpahulam niyag kuwarta nga way patong nga interes.

DUGAY na kadtong hitaboa. Ug bag-o pang mitaliwan sa laing kalibutan sila M’am Jul ug Sir Zim. Giampo ni Abloy ang ilang mga kalag sa kapahulayang dayon, dili lang kaniya kundili alang sa tanang mga silingan nga nakatilaw sa kamaayo sa magtiayon nga naghambin og malumong mga kasingkasing. (KATAPUSAN)