SUPER CURRY
Nagpaulbo og bag-o niyang season-high nga 45 puntos si two-time MVP Stephen Curry aron pangulohan ang dominasyon sa defending champions Golden State Warriors batok sa host Los Angeles Clippers, 121-105, kagahapon sa National Basketball Association (NBA).
Sa ikaduhang sunodsunod nga duwa diin wala si Kevin Durant, gipakita ni Curry kon unsa siya ka bangis sa opensa aron irehistro ang iyang ika28 nga duwa diin nakamugna siya og 40 puntos o pataas. “He’s been on fire. Maybe the break was good for him. He’s been amazing,” matod ni Warriors coach Steve Kerr kabahin sa iyang pambatong pointguard.
Grabe ka agresibo si Curry. Mitali siya og 11-of-21 shooting unya 8-of-16 sa three-point area. Nakapasulod siya og 28 ka three-point shots sa miaging upat ka mga duwa sukad sa iyang pagbalik gikan sa pagkaangol.
Kausa ra sab nasipyat si Curry sa iyang 16 ka freethrows unya natigom niya tanang mga numero sulod lang sa tulo ka quarters. Sa halftime, aduna na siya’y 29 puntos.
“I just knew right away when I got free for a couple of 3s in the first quarter and when they went down, I started to get a rhythm,” pasabot ni Curry.
“But beyond that, you just keep your head down and keep shooting, keep being aggressive, and that’s really it.”
Gumikan sa kainit sa duwa ni Curry, daw gilawgan na lang sab gyud siya’g insakto sa iyang mga kauban. Wala laing sakop sa Warriors nga nakamugna og kapin sa 11 puntos.
“Other than Steph’s performance, it was a pretty bad basketball game all the way around .... There wasn’t much energy in the building,” dugang ni Kerr.
Sa sunodsunod nga mga puntos nga gimugna ni Curry, ang mga tumatan-aw ming-abiba na lang sab kaniya nga daw nagduwa ang Warriors sulod sa ilang balwarte.
“Honestly, I always feel like I’m hot,” batbat ni Curry. “... When I’m out there playing, every shot you take, you feel like it’s going in. Coming off of that injury, obviously, I got fresh legs, I got a nice rhythm, I was able to put some good work in a week and a half before I got back on the floor, and that’s pretty much it.”
Ang Warriors mingsaka sa 32-8 nga rekord samtang ang Clippers natagak sa 17-21 nga baraha.
Sa laing mga duwa, ningdaog ang Boston Celtics batok sa Brooklyn Nets, 87-85, Cleveland Cavaliers batok Orlando Magic, 131-127, Detriot Pistons batok Houston Rockets, 108-101, Indiana Pacers batok Chicago Bulls, 125-86, Milwaukee Bucks batok Washington Wizards, 110-103, Minnesota Timberwolves batok New Orleans, 116-98, ug Sacramento Kings batok Denver Nuggets, 106-98./