LABING ESTRIKTONG SINULOG: OSMEÑA
Ang umaabot nga Sinulog 2018 ang labing estrikto nga selebrasyon, matod pa ni Cebu City Mayor Tomas Osmena.
Taas nga panahon ug proseso ang gigahin sa mayor aron masiguro nga way makabalda kapistahan ni Snr. Sto. Nino.
Mibutyag sab si Osmena nga naglikay siya sa posibleng mga bomb threat nga mahimong makagubot samtang gipahigayon ang selebrasyon.
Kahapsay ug kalipay ang tumong sa kapistahan alang sa batang Jesus maong mas naningkamot siya sa pagpaestrikto aron hapsay ang dagan sa selebrasyon apan nanghinaot sab siya nga daghan ang mokooperar niini.
Usa sa mga gipatuman niya nga polisiya mao ang pagdili sa inom o liquor ban ug mga street party sulod sa 300 metros palibot sa rota sa Sinulog grand parade.
Bisan ang mga hotel gidid-an sa pagdalit og ilimnong makahubog ngadto sa ilang mga guest.
Ang bisan unsa nga establisemento nga masakpan gibaharan ni Osmeña nga suspensuhon ang business permit.
Dunay nangayo kaniyag permiso alang sa usa ka kalingawan sa South Road Properties (SRP), apan iyang gibalibaran kay way kalambigitan sa Sinulog.
ALANG SA MGA BATA
Sumala pa niya nga angay hatagan og dakong importansya ang mga bata atol sa selebrasyon.
“But we are all making this as the strictest Sinulog because it is our long term process to make the Sinulog child- friendly,” dugang pa sa mayor.
Si Osmeña nipasabot nga ang kapistahan alang sa kabataan.
“The Sinulog is for children and that is what Cebu is all about and I want to reinforce that as part of our culture,” matod pa niya.
Gusto sab ni Osmeña nga di mabalaka ang mga ginikanan alang sa ilang mga anak kon diin kalinaw ug kalipay lamang ang ilang masinati atol sa Sinulog 2018.
VENDORS GIREHISTRO
Si Genevieve Alcoseba Operations, chief sa Division for the Welfare of the Urban Poor (DWUP), nangayo og dispensa para sa mga manghangyo pa nga morehistro apan wala nagyud kini gitugot pa.
Karong tuiga, nidagan sa 2,796 ang rehistrado nga mga Sinulog vendors ug milapas pa kini sa gipaabot nga 2,000 kapin.
“Mangayo gyud mi og despensa kay dili na gyud pwede kay if we will give another extension we will not finish to our job, we still have to do the ID’s, the permits and all”,matod ni Alcoseba.
MOHATOD
Sa labing unang higayon, mosalmot si Osmeña sa relihiyusong kalihukan sa kapistahan.
Ang mayor mangulo sa pagdala sa imahen ni Sto. Niño ug Birhen Maria ngadto sa Saint Joseph National Shrine sa Mandaue atol sa Traslacion../Michelle