Na-dengue human mabakunahi

Niabot na sa 25 ka mga bata ang natala sa Department of Health (DOH) 7 nga nagkadengue human sila mahatagi sa kontrobersiyal nga anti-dengue vaccine, Dengvaxia.

Hinuon gikompirmar ni DOH 7 Regional Director Dr. Jaime Bernadas nga wala’y patay sa Sugbo nga nahatagan sa maong bakuna ingon man luwas ang tanang nagka-dengue.

Sa labing uwahi nga inventory sa DOH 7 sa Dengvaxia vaccines niadtong Disyembre 21, 2017, niabot na sa 63,108 ka mga bakuna ang nakuha na nila og balik.

Aduna’y nahabilin nga 1,489 nga mao nalang ang gihuwat gikan sa duha ka mga lungsod sa isla sa Camotes.

Matod ni Bernadas nga nakig-alayon na sa ilang ahensiya ang mga pribado nga clinic ingon man tambalanan nga namaligya usab sa maong bakuna aron apil kini nila sa ilang monitoring.

Gipahibawo ni Bernadas nga lakip na kini sa ilang gimonitor karon.

Sa labing uwahi nga datus sa Regional Epidemiology and Surveillance Unit (RESU) 7 sa kaso sa dengue sa Sugbo niadtong Disyembre 23, naguna gihapon ang dakbayan sa Sugbo diin aduna kini’y 2,623 ka kaso ug 32 ang patay itandi niadtong 2016 nga 4,150 ka kaso ug 33 ang kaso.

Nipasabot si Bernadas nga ubos ang trend sa 2017 tungod kay matag duha ka tuig ang nakita nila nga pagsaka sa mga kaso niini.

Sunod sa Cebu City mao ang Lapu-Lapu (1,209 ka kaso, ug 13 ang patay).

Ikatulo mao ang Mandaue City sa kaso nga 909 ug 4 ang patay diin mas mubo kini itandi niadtong 2016./