Sinulog 2018

Kon walay kausaban ang plano sa dakbayan sa Sugbo, ang Sinulog 2018 lahi sa mga nangaging kasaulogan gikan sa relihiyusong kalihokang tulumanon ngadto sa kalingawan palibot sa dakbayan alang sa turismo nga gihigpitan na pag-ayo ni Mayor Tomas Osmeña. Sa unang higayon nga ang fluvial procession moagi na sa Muelle Osmeña sa dakbayan sa Lapu-Lapu aron pagsugat sa Birhen sa Regla. Naandan nga gikan kini sa Ouano wharf sa dakbayan sa Mandaue sa pagbalik sa imahen ni Sto. Niño sa Basica Minore sa bespiras sa kapistahan sa Balaang Bata sa Sugbo.

Dakong kausaban sa Sinulog 2018 mao ang mga kalingawan nga naandan ug mas nakapaalegre sa kapistahan nga naila sa tibuok kalibotan hinungdan nga daghang lokal ug langyaw nga turista ang mangabot, gawas sa minilyon nga mga deboto sa Sto. Niño.

Wala nay inom o party sa mga resto-bar o clubs sa dakbayan nga maagian sa rota sa Sinulog grand parade, diin dakong bahin niini nahimotang ang mga tourist-oriented nga mga estabilisemento sama sa Gen. Maxilom Avenue ug Osmeña Boulevard. Ang parties ug ubang dagkong kalingawan gitugotan sa South Road Properties (SRP). Medyo nakapabor ang mall ug ubang estabilisemento sa dapit.

Daghang wala nakauyon niini labi na sa mga batan-on nga gusto og kiat ning panahona samtang, dunay uyon tungod sa ilang pagtan-aw nga ang Sinulog usa ka relihiyusong kalihokan ug seryuso kini.

Pareho nga sakto ang mga panahom sa publiko. Apan ang lokal nga kagamhanan nagtan-aw sa kaluwasan ug kahapsay sa piyesta. Hinuon, dili usab maayong palabihan human ang Sinulog dakong grasya alang sa mga negosyo, ginagmay o dagko , nga mokita ning panahona. Segurado nga daghan gihapon ang tawo o kustomer. Motuman lang kita sa balaud.