My love is your love
Puwerte gyung lipaya ni Mona. Kinsa kahay iyang gikaestorya, no, sa selpon? Hilom kong nakapangutana sa akong kaugalingon. Madungog ko kaayo ang iyang katawa. Wa siya makamatikod nako nga nagkaduol niya.
“Ikaw gyud, ha? Pangulitawhan pa gyud ko nimo nga may uyab ka na man?”
Sa tan-aw ko kang Mona, kilig to the max ang gibati niyang kalipay. Nakapanglingo na lang ko ug mipakibo sa akong mga abaga. Gipasagdan ko na lang ang akong best friend. Wa ko siya tugawa sa iyang kalipay. Midiretso kog lakaw.
Nalipay sab ko sa nakitang kalipay ni Mona. Gusto gyud nako nga magmalipayon siya labi na sa iyang lovelife. Nagtuo ko nga duna na say bag-ong suitors si Mona. Gusto nakong sugton na sa akong best friend ang maong lalaki.
Pagka gabii mituyo kog adto sa balay nila ni Mona. Malipayon kaayo siyang miatubang nako. Nanglingkod mi sa swing sa ilang lawn. Samtang nag-estoryahay mi, gitabyug-tabyog namo ang gilingkoran namong swing.
“Salamat kaayo, ha, Sandra.”
Nakatan-aw kog dugay kang Mona. Kalit kong miseryuso. Nagpangidhat si Mona nako. Wa ko makasabot sa iyang giingon.
“Salamat? Para sa unsa man na, Mona?”
“Sa imong pangandoy nako nga magmalipayon ko. Tinuod gyud kang best friend, di selfish. Wa lang magtan-aw sa kaugalingong kalipay. Nagtan-aw ka sab nako. Makamao kang mo-share og kalipay, My friend.”
Nahikatawa ko. “Siyempre. Amiga gud tika kaayo. Dream nako, uy, ang imong kalipay sa imong lovelife.”
Miyangu-yango si Mona. Bisag nahilom siya apan nagsmile gihapon siya. Unya nahinumdom ko sa iyang pagpakigsulti sa selpon ganina sa usa ka lalaki.
“Kining, Mona, ganina ba may gikaestorya ka sa selpon. Grabeng kalipay ang nakita ko nimo. Suitors to nimo, no?”
“Ay, oo, uy. You know, My friend, siya ang rason kon nganong nagmalipayon na ko ron.”
“Aw, kon mao na, sugta na siya Taym sa, uyab na tingali mo ron, no?”
Nahilom si Mona. Kalit siyang miseryuso. Didto siya magtan-aw sa layo. Morag duna siyay gihunahuna pag-ayo.
“Di sayon ang pagsugot niya, Sandra. Very complicated ang situation.”
Unya mitan-aw og dugay si Mona nako. Nagkatinan-away mi. Nahibulong ko sa nakia kong reaksiyon niya karon. Unya nanghupaw siya.
(SUMPAYAN)