545 giatiman sa medical mission sa San Fernando
Nibalik ang misyong medikal sa bukirang barangay sa Tonggo sa lungsod sa San Fernando paglabay sa duha ka tuig ug mialagad sa 545 ka mga lumolupyo, ika-4 na kini sukad 2006 nga gipasiugdahan sa Solid Earth Development Corp. (SEDC).
Gidasig ni Kapitan Virgilio Siarot ang iyang tagibarangay nga kapuslan ang serbisyo ug mga libreng tambal didto sa Tonggo Elementary School, kalihukan nga inabagan sa Taiheiyo Cement Philippines, Inc. (TCPI).
Natagad sa mga doktor ang 186 ka mga hamtung nga mikutlo’g 461 ka mga nagkalainlaing sakit, ug 223 ka mga bata nga mitamla og 583 ka problema sa kahimsog, mibutyag si Mitzie Almira I. Carin, tagduma sa SEDC alang sa human resources and administration.
May 100 ka mga hamtung nga nasutang may problema sa panan-aw ug nahatagan og antipara matag usa, ug laing 36 nga naibtan og mga dautang ngipon, siya midugang.
Nabatyagan sa mga hamtung ang altapresyon, myalgia (panakit sa kalawasan), artraytis, kumon nga pag-ubo ug panip-on, ug mga pagsu-ol sa kuto-kuto, matod ni Dr. Ildebrando Estella, mananambal sa TCPI.
May mga kumon nga pagubo ug panip-on sab ang mga bata ug pagkadunot sa ilang mga ngipon, siya midugang.
Nangunay sa pagdumala sa misyon ang direktor sa SEDC nga si Hiroyoki Sakakibara uban sa iyang technical adviser nga si Masahiro Tate ug sa pag-abag sa tagdumala sa planta sa TCPI nga si Kazuhiko Ichizawa.
Miuban ang upat ka mga konsehal sa Tonggo – sila si Felix Siarot, Felix Suico, Manuel Genargue ug Rosa Sarol – sa kapitan, sekretarya sa barangay nga si Aida Villariasa ug mga barangay health worker sa pagpahapsay sa kalihukan.
Kanhi hiniusang gipasiugda sa SEDC ug TCPI, unang mitagad ang misyon medikal sa 446 ka mga pasyente pagka-Hunyo 2006, dayon 800 sa Nobyembre 2011, ug 479 sa Marso 2015.
Nalagaran sukad sa mga medical mission sa lungsod sa San Fernando sa habagatan sa lalawigan sa Sugbo hangtud karon, niabot na kini og 22,724 ka mga pasyente.