BAG-ONG PAGLAOM SA BAG-ONG TUIG
Mga duwa karon
4:30 pm- Kia batok Magnolia 7:00 pm- Alaska batok Meralco
Bag-ong tuig, bag-ong paglaom.
Mao kini ang naa sa alimpatakan sa Kia Picanto sa ilang pagpakigbatok sa Magnolia Hotshots alang sa labing una nilang tahas sa 2018 sa premirong duwa karong hapon sa Philippine Basketball Association (PBA) Philippine Cup sa Araneta Coliseum.
Sa wala pa nagsugod ang komperensya, gihagbaan na og kontrobersya ang Kia unya nabunyagan kini'g duha ka sunodsunod nga kapildihan batok NLEX Road Warriors, 115-119, ug Phoenix Fuel Masters, 102-125.
Ning bag-ong tuig, ang Picanto adunay bag-ong coach nga si Ricky Dandan, kinsa maoy gihulip kang Chris Gavina.
Nakahukom si Gavina nga moluwat sa iyang katungdanan human sa duha ka sunodsunod nga kapildihan sa Picanto.
“I’m excited and humbled to be competing as a rookie head coach in the PBA,” batbat ni Dandan, kinsa nahimong assistant coach ni Kia team manager Joe Lipa sa FedEx, Bo Perasol sa Powerade, Glen Capacio ug Junel Baculi sa GlobalPort kaniadto.
“I’ve had seven practices to install our system. My priority, however, is to make sure that we become a team first before we can move forward,” dugang ni Dandan.
Sayod si Magnolia coach Chito Victolero nga taas og moral ang Picanto hinungdan nga dili sila angayang molugak bisan gamay.
“Kia is a very dangerous team with the new coach and new system,” matod ni Victolero. “We expect a hard game and we need to be ready mentally and physically.”
Ang Hotshots adunay 1-1 nga rekord.
Sa main game, magsangka ang Alaska Aces ug Meralco Bolts.
Ang Bolts naghupot og 1-1 nga rekord samtang ang Aces padayon pa'ng mangita sa labing una nilang daog sulod sa tulo ka mga duwa.
Wala pa man tuo'y daog ang Aces apan nasayod si Meralco coach Norman Black nga dili kini basihan sa kapabilidad sa 1996 Grandslam champion.
“It’s very important that we do a good job of handling their pressure defense while limiting our turnovers,” matod ni Black.