UV/SG ARQ vs. UC/M.Lhuillier
Mga duwa karon 4:30 pm- Cebu Landmasters/Bogo City batok USJ-R 6:30 pm- UC/M.Lhuillier batok UV/SG ARQ Builders
Mosuway pagbangon gikan sa pagkapandol ang University of Cebu (UC)/M. Lhuillier Webmasters sa ilang pagpakigbatok sa University of the Visayas (UV)/ SG ARQ Builders sa main game karong gabii sa pagpadayon sa Cebu City Sinulog Cup Invitational basketball tournament sa Cebu Coliseum.
Ang Webmasters ni coach Raul “Yayoy” Alcoseba nasubhan og 71-79 nga kapildihan batok sa Cebu Landmasters/ Bogo City niadtong Lunes sa pagsugod sa kompetisyon.
Sama sa Webmasters, ang Builders ni coach Gary Cortes nabunyagan sab og kapildihan batok sa Philippine Basketball Association (PBA) D-League squad Marinerong Pilipino, 70-90, niadtong Lunes.
Kagahapon, ang Builders padayon pang nakigsangka sa Cebu Landmaster/Bogo City ning pagsuwat.
Ang Webmasters magsalig og maayo nila ni import Frederick Elombi, Virlo Orquez, Joseph Nalos, Justine Dacalos ug John Calvin Jabello.
Sa ilang bahin, ang Builders mosandig sa katakos nila ni Rey Suerte, Tristan Albina, Maestre Michael Heinrich, Jan Monic Soliva ug Jerome Napao.
Sa premirong duwa, ang Cebu Landmaster/Bogo City makigbatok sa University of San Jose Recoletos (USJR) Jaguars.
Ang unom ka mga adlaw nga torneyo mosubay sa single-round robin elimination
unya ang mopatigbabaw nga duha mao ang magsangka sa knockout finals samtang ang magsunod nga duha mag-ilog sa ikatulong dapit.