CAVALIERS KULATADO
Minneapolis- Gipanglubong nga buhi sa host Minnesota Timberwolves ang Cleveland Cavaliers, 12799, kagahapon sa National Basketball Association (NBA) atubangan sa soldout crowd 18,978 sa Target Center.
Si Andrew Wiggins, kinsa gipili sa Cavaliers isip no. 1 overall pick niadtong 2015 apan gilabay sa Minnesota, maoy nangulo sa kabangis sa Timberwolves pinaagi sa iyang 25 puntos.
Aduna pa’y laing lima ka mga magduduwa ang Timberwolves nga ningmugna og double-digit nga puntos.
Si Jimmy Butler, kinsa nitapon sa Minnesota gikan sa Chicago Bulls, nidugang og 21 puntos alang sa kadaugan.
Ang 2016 Rookie of the Year awardee nga si Karl-Anthony Towns mitampo’g 19 puntos ug 12 rebounds alang sa Timberwolves, nihatag og 16 puntos si Taj Gibson, nidugang og 11 puntos si Gorgui Dieng samtang niamot og 10 puntos si Jamal Crawford.
Sayong ningbulhot sa duwa ang Timberwolves ug naglabaw na dayon sila’g 32-15 human sa 1st quarter.
Nagtambayayong sila si LeBron “King” James ug Dwyane Wade sa pagsuway og agak sa Cavaliers sa 2nd quarter apan wala gihapon sila nakasanta sa nagdilaab nga ataki sa Timberwolves.
Sa halftime, gipaburot sa Timberwolves ang ilang labaw, 69-42.
Nagpadayon ang kabangis sa Timberwolves sa 3rd quarter ug ilang giinat ang ilang labaw ngadto sa 102-62. Ning higayuna, tatawng ningdawat na ang Cavaliers sa ilang kapildihan.
Milingkod ug wala na mibalik sa pagduwa si James sa 4th quarter human siya naluya sa pagsuway og gukod sa labaw sa Wolves.
“I play both sides of the floor,” matod ni James.
“I don’t just score or rebound or pass the ball. Anytime you get a steal it allows us to get the ball in the open court and not play against a set defense.”
Ang four-time MVP nga si James igo lang nakamugna og 10 puntos, iyang labing ubos nga nahimo gikan niadtong Oktubre, 2007.
Ang laing pambato sa Cavaliers nga si Kevin Love igo lang sab nimugna og tulo ka mga puntos.
Nangulo sa Cavaliers ning higayuna mao si Jeff Green pinaagi sa iyang 22 puntos, nidugang og 19 puntos si Kyle Korver samtang nihatag og 13
puntos si Wade.
Sa laing mga duwa, ningdaog ang Indiana Pacers batok sa Milwaukee Bucks, 109-96, Toronto Raptors batok Brooklyn Nets, 114-113 (OT), Houston Rockets batok Chicago Bulls, 116-107, New
Orleans Pelicans batok Detriot Pistons, 112-109, San Antonio Spurs batok Sacramento Kings, 107-100, Golden State Warriors batok Denver Nuggets, 124-114, ug LA Clippers batok Atlanta Hawks, 108-107.