CAVS GIUSBAN OG LUBONG
Nasinati ni LeBron James ug sa Cleveland Cavaliers ang labing dako ug labing makauwaw nilang kapildihan dihang gipanglubong sila nga buhi sa host Toronto Raptors, 99-133, kagahapon sa National Basketball Association (NBA).
Ang Cavaliers nakaangkon sa ikaunom nilang pilde sa miagi nilang walo ka mga duwa gikan niadtong gipangbuntog sila sa defending champions Golden State Warriors sa ilang finals rematch niadtong adlaw sa Pasko.
Ning maong kapildihan, si James nimugna og 26 puntos apan wala na kini miduwa sa
4th quarter gumikan kay ningdominar na’g maayo ang Raptors human sa tulo ka quarters.
Nagkanayon si James nga wala siya’y nakuhang ideya kon unsa’y nahitabo kanila.
“I don’t know where it kind of went wrong or what happened,” matod ni James. “We’ve got to try to pick it back up and find it.”
Kini maoy ikaduhang sunodsunod nga duwa nga nalubong og taga liog ang Cavaliers apan tataw nga mas grabe ning higayuna.
Ang 133 puntos nga natali sa Raptors maoy labing dako nga napupo sa mga nakontra sa Cavaliers ning maong season.
Ikatulo kining higayon nga nakaabot ang kontra sa Cavaliers og labing ubos 127 puntos.
Si Kevin Love, kinsa igo lang nimugna og 10 puntos, masaligon nga makabawi ra ang Cavaliers ning maong
kasinatian ug makataak sila pagbalik sa finals sa ikaupat
nga sunodsunod nga season. “We have enough talent here to get over that hump and make a lot of good things happen,” batbat ni Love.
“Right now it’s just tough to see the light at the end of the tunnel but it is there. We will get out of it and we will get better.”
Balanseng ataki ang gipakita sa Raptors aron makmakon ang Cavaliers diin pito sa ilang mga magduduwa ang ningmugna og dobleng numero nga puntos pinangulohan ni Fred VanVleet, kinsa nipakatap og
career-high nga 22 puntos.
“I was really proud of the way
he came to play,” asoy ni Raptors coach Dwane Casey kabahin sa gipagawas nga duwa ni VanVleet.
Nagsilbe kining panimalos sa Raptors ngadto sa Cavaliers nga ningbutlog kanila, 4-0, sa second round sa playoffs sa miaging season niadtong Mayo.
Si Isaiah Thomas, kinsa miduwa sa ikaupat nga higayon sa Cavaliers gikan sa angol niini sa bat-ang, nagkagidlay sa tibuok kombati.
Nasipyat siya sa iyang unang 11 ka mga itsa. Naposte ni Thomas ang labing una
niyang puntos sa nahabiling 7:22 minutos sa 3rd quarter apan igo ra gihapon siyang nakatigom og upat ka mga puntos pagkahuman sa duwa.
“He’ll be fine,” asoy ni Cavaliers coach Tyronn Lue kabahin kang Thomas. “He’s going to have to work out some kinks, but he’ll be fine.”
Sa laing mga duwa, gipangbuntog sa Boston Celtics ang Philadelphia 76ers, 114-103, gipangyukbo sa Los Angeles Clippers ang Sacramento Kings, 121-115, samtang gipakaging sa Los Angeles Lakers ang San Antonio Spurs, 93-81.