TRAPIK GIPAABOT SA TEAM UNYA SA BIYERNES

Nipahimangno ang Traffic Enforcement Agency of Mandaue (TEAM) kalabot unya sa gipanglantawan nga kahuot sa trapiko karong umaabot Enero 19 sa dakbayan.

Kini mahitungod sa tulo ka dagkong mga kalihukan nga pagahimuon sa dakbayan sa maong adlaw.

Inig ka buntag, dawaton ang imahe sa Balaang Bata gikan sa may dalan AS Fortuna paingon sa simbahan sa St. Joseph alang sa Traslacion.

May mga dalan nga temporaryong sirad-an atol sa kalihukan nga maigo sa rota sa parada.

Pagkaudto, may Panagtagbo Festival nga pagabuhaton sa dakbayan agig halad sa Traslacion.

Pipila ka mga dalan dapit sa may City Hall ang sirad-an sugod alas 12 sa udto.

Pagka-alas 3 sa hapon, ang Life Dance magsugod sa ilang dakong party sa may Ouano Avenue, North Reclamation Area atbang sa Parkmall.

Wa hinuoy road closure ipatuman ang Team.

“Mao nay problema nato kay dungan ang activities sa Traslacion, Panagtagbo, ug Life Dance. So, daghang activities sa Mandaue mao nang kulatado ang Team,” ni Glenn Antigua, pangulo niini sa dihang nahinabi sa mga tigbalita.

Dugang niya nga mas mohuot nga ang trapik sa maong adlaw tungod kay kini Biyernes, padung na weekend.

Giangkon ni Antigua nga sa milabayng tuig pa gipanglantawan sa kagamhanan sa dakbayan sa Mandaue nga ang dagkong mga kalihukan sa dakbayan sa Sugbo mobalhin sa dakbayan tungod kay ni-istrikto ang Cebu City Government sa paghatag og permit sa mga organizer nga buot mohimo og kalihukan sa Sinulog susama sa Life Dance.

Matod ni Antigua nga di lang Life Dance ilang tutokan sanglit may mga dagkong establisemento sab sa dakbayan ang ni-apply og permit sa kagamhanan.