TIKET SA SINULOG GISUGDAN NA OG BALIGYA

Gisugdan na og baligya sa Sinulog Foundation Incorporated ang libuan ka mga ticket alang sa umaabot nga Sinulog 2018 nga ipahigayon karong Enero 21.

Si Ricky Ballesteros, executive director sa SFI, nagkanayon nga mapalit ang mga ticket sa ilang buhatan sulod sa Cebu City Sports Center (CCSC) ug mismo sa internet pinaagi sa website nga Sinulog.ph.

Matod niya nga adunay 6,000 ka Sinulog tickets ang ilang gibaligya nga gisugdan niadtong Biyernes, apan ang online selling ilang gisugdan pipila na ka semana ang nakalabay.

Ang ilang ticket nagkantidad og P1,000 (green) P1,500 (yellow) P 2,500 (blue) ug P3,000 (red) diin ang blue ug red adunay libreng paniudto samtang base sa ilang website, ang kadtong mopalit og ticket pinaagi sa online, adunay 7% charge.

Sa pagkakaron, wala pa maihap sa SFI kon pila na ka mga ticket ang ilang nabaligya gikan sa ilang buhatan lakip na ang nahalin pinaagi sa ilang website.

Apan gipadayag ni Ballesteros nga nag-anam na kakusog ang halin sa ilang ticket ug iyang gipahibawo nga mosamot kakusog ang pinalitay sa mosunod nga mga adlaw sanglit nagsingabot na ang kapistahan ni Snr. Sto. Niño.

Kon aduna pay mahabilin nga ticket nga di mahalin, ila kining ibaligya mismo sa adlaw sa Sinulog sa Enero 21 didto sa entrance sa CCSC para kadtong wala pay ticket makapalit.

Ang Sinulog gikatakdang sugdan sayo sa buntag ug paningkamotan nga mahuman sa alas 4 sa hapon sanglit sa selebrasyon, ang adlaw dali ra nga mosawop ug ang seguridad maoy gitan-aw sa SFI ug sa City Government.