Manindahay libot sa Basilica gihan-ay

Para sa han-ay ug hawan nga sidewalk sa palibot sa Basilica Minore del Sto. Niño, nilusad og subsob nga clearing operation ang Prevention Restoration Order Beautification Enhancement (Probe) sa Cebu City Government.

Ang gatusan ka mga ambulant vendor gihiusa sa tulo ka block sa dalan Lapu-Lapu partikular duol sa Metropolitan Cebu Water District (MCWD) duol sa Commission on Election ug duol sa marker ni Don Sergion Osmeña Sr..

Si Raquel Bohol-Arce, pangulo sa PROBE nagkanayon nga gikan pa niadtong adlaw nga Lunes, sila nagsugod og limpyo sa Basilica square diin ang mga vendor ug kadtong mga balay patigayon kansang mga lamesa niabot sa sidewalk, ilang gipahipos.

Lakip sa mga dalan nga gihulagway ni Arce nga luwas gikan sa obstruction mao ang Magallanes, Plaridel, F. Gonzales, Urdaneta, Zamora, Legaspi ug Osmeña boulevard nga usa ka discipline zone.

Gipasabot sa pangulo sa Probe nga gihawanan nila ang palibot sa Basilica sanglit ang sagradong lugar maoy sentro sa kalihukan sa labi na sa siyam ka adlaw nga nobenaryo sa kapistahan sa Balaang Bata nga si Señor. Sto. Niño.

Gitug-an ni Arce nga kadtong mga vendor nga ilang gibadlong lakip na ang tag-iya og establishment nga sa higayon nga mobalik sila sa lugar nga gidili kanila sa pagpaninda, sa sunod ila nang embarguhon ang mga gamit ug produkto nga baligya.

Iyang giawhag ang mga tawo sa pagpakigtambayayong sa City Government hilabi na nga minilyon ka mga bisita ang modagsa sa dakbayan gumikan sa Sinulog.

Nagpasalamat siya sa suporta nga gihatag ni Mayor Tomas Osmeña sa iyang buhatan ug ni General Mario Espino sa Police Regional Office (PRO) 7.

Giawhag ni Arce ang mga tawo sa pag-text sa hotline number sa Probe 0918-9113232 kon adunay mga vendor palibot sa Basilica nga nagpabadlong o bisan si kinsa nagkatag og hugaw o basura sa dapit.