8 ka pulis lang gipuno sa Talisay

Walo ra ka mga pulis ang nadugang sa dakbayan sa Talisay human girelibohan ang 12 ka pulis sa maong siyudad nga gipailawom sa re-training.

Una niini, migawas ang report nga moabot sa 14 ka personnel ang madestino sa Talisay City Police Station aron hulip sa 12 nga nawala.

Apan sa miaging adlaw, miabot na ang walo ka mga pulis nga gipada sa Cebu Provincial Police Office.

Matod ni Supt. Jason Villamater, hepe sa kapulisan sa Talisay, nga wa siya masayod kon mao na ba kini ang hulip tungod kay ang anaa sa kamanduan igo man lang sila nga gi-augment sa ilang buhatan.

Sa pagkakaron, ang maong mga pulis iyang gilakip sa pagpa-roving sa dakbayan.

Wa siya masayod kon hangtod kanus-a kutob ang mga pulis sa Talisay sanglit posible man usab nga makabalik ang 12 ka pulis human sa ilang seminar ug training.

Nanghinaot si Villamater nga madugangan ang walo ka mga pulis sanglit 12 ang nawa ug kuwang silang daan.

Samtang si Mayor Eduardo Gullas nipadayag nga dili siya manghilabot sa desisyon sa kadagkuan sa CPPO pagrelibo sa 12 ka mga personnel.

Apan ang iya lang nga kon kuhaan man gani sila, mas maayong mahulipan usab dayon ang mga pulis nga nawala.