Dalaga naghikog-patay sulod sa lawak sa T. Padilla

Patay ang usa ka babaye human kini naghikog alas 6:00 sa gabii niadtong Biyernes sa Barangay T. Padilla, dakbayan sa Sugbo.

Ang biktima mao si Sheena Marie Madera, 21, ug adunay live-in partner.

Matod sa amahan sa iyahang live-in partner nga si Nelson Monreal, si Madera anaa sa iyang kwarto kauban ang iyahang usa ka tuig nga anak.

Apan sa pipila ka mga minutos nabalaka na ang pamilya niini kay nagsiyagit na og hinilak ang anak niini sulod mismo sa kwarto nga ilang nahimutangan.

Gipugos sa mga kabanay ni Madera nga ablihan ang pultahan sa kwarto, apan sa pagdayon nila og abli, ilang nakita si Madera nga nagbitay na gamit ang hiktanan sa iro nga gihikot sa iyahang liog.

Dali siya nga gidala sa Cebu City Medical Center (CCMC) apan gideklarar kini sa doctor nga dead-on-arrival.

Miangkon ang inahan niini nga si Elizabeth Camonego nga mahilig magsekreto ang iyang anak sa kaugalingong mga problema.

Dugang pa sab ni Camonego nga kapila na nagpakita'g motibo ang iyang anak nga magpakamatay.

Nagduda ang inahan nga adunay problema nga pinansyal sa pamilya ang anak ug wa na kini makaantos, hinungdan nga naghunos kini sa iyang kaugalingong kinabuhi.