PINIRISO NABUHI HUMAN MIHAGOK

Mihimo og imbestigasyon ang awtoridad sa usa ka prisohan sa Espanya human masaypi og deklarar ang usa ka piniriso nga patay na apan diay buhi pa.

Si Gonzalo Montoya Jimenez, 29, ang napalgan nga wala na magginhawa sud sa iyang selda sa Asturias Central Penitentiary niadtong Enero 7 ug kini gituohan nga namatay na, sumala sa news agency, La Voz de Asturias.

Tulo ka forensic nga mga doktor ang nisusi ni Jimenez ug ni-certify sa iyang kamatayon.

Apan human sa upat ka oras, dihang i-autopsy na unta ang lawas niini, siya nadunggan nga naghagok ibabaw sa lamesa.

Ang iyang lawas gimarkahan na sa embalsamador alang sa himuon nga autopsy.

Si Jimenez dali gidala sa intensive care unit sa Central University Hospital sa Asturias sa Oviedo, Spain.

Ang pamilya ni Jimenez niingon nga duna kini epilepsy.

Matod sa Live Science ang epilepsy maghimo sa tawo nga naa sa “trancelike state” diin ang iyang muscles mogahi ug dili na mo-respond, kini gitawag og “catalepsy.”

Dili kini ang unang higayon nga dunay tawo nga gideklarar nga patay na apan diay buhi.

Niadtong 2014, usa ka 91-anyos nga babaye sa Poland ang gideklarar nga patay apan human sa 11 ka oras sa mortuary nadiskobrihan nga buhi kini dihang nilihok ang body bag nga gisudlan sa iyang lawas, sumala sa BBC. /