Stress buster

Daghan ang nakugang sa kamatayon sa aktres nga si Isabel Granada tungod kay medyo bata pa siya. Namatay siya tungod sa epekto sa aneurysm.

Sa mga pagtuon, usa sa mga hinungdan sa aneurysm mao ang stress. Kining stress mao ang kahimtang sa imong pangutok nga moresulta sa grabeng emosyon tungod sa mga panghitabo sa kinabuhi o palibot, sama sa pressure sa trabaho ug kinabuhi.

Busa, ang stress di angay kompyansahan tungod kay hinayhinay ning mokutkot sa imong kaugalingon hangtod nga kalit ka lang nga mobugto. Hayan tungod sa kalapoy tingali ni Granada, na stress na siya hinungdan sa aneurysm.

Bisan unsa ka healthy sa imong gikaon, kon ikaw stressed na sa dagan sa imong kinabuhi, kuyaw na kini. Mga timailhan sa stress mao ang kalisod sa pagkatulog (insomnia), iritable ka, maglisod sa pag-concentrate ug uban pa. Sa kaon, duha ang posibleng mahitabo nimo-either ganahan o wa kay gana sa pagkaon.

Kon naa ka ini nga symptoms, mas maayong mokunsulta ka og psychiatrist o modangop sa proven na nga paagi- exercise o yoga.

NGANONG MAAYO

Sa mga pagtuon, kon ikaw mag-ehersisyo, bisan sa 20 minutos lang nga hinayhinay nga dagan, mopagawas ang imong lawas og dopamine, usa ka matang sa feel good hormone. Nakabantay ka sa kaanindot sa imong feeling human sa exercise? Kini tungod sa mga feel good hormone nga gipagawas sa imong lawas matag exercise.

Mao bitaw nga gitawag ang exercise og stress buster. Gawas nga mawagtang ang imong stress, makaayo pa kini sa imong panglawas kay iya man wagtangon ang toxins sulod sa lawas ug sunugon pa ang fats.

Niingon na ko nga human mamatay ang akong anak, nidangop sa ko mountain biking, diin nakabaton ko og bag-ong mga higala nga maoy nagggiya nako sa mga biyahe sa kabukiran. Gawas sa kalipay nga nakatungas ko sa mga bukid, nalipay sab kong nagtan-aw sa napabarog nakong mga biseklita.

Kanang mag-ilis og frame, ligid ug uban pa, makalingaw sab.

MGA HIGALA

Dako kaayo og ikatabang sa imong kalipay ang pagbaton og bag-ong mga higala. Sa akong biseklita, akong nasuod akong mga high schoolmates kaniadto nga sila si Embet Entice ug Ramon Villamor nga mas una nako sa biking. Regular na sab nakong nakauban sila si Wendel Valeriano nga paborito nakong bike technician, Jovanie Tudtud, Philam Timagos ug Bambam Gacko.

Sa folding biking, akong nasuod sila si Jay Garganera, Dong Ernest Sibi, Christian Maningo, Clark Jueco, Felix Canono Jr., Dongdong Ygay, Allan Defensor, Glenn Chan ug Engr. Ben Fazon.

Kining mga tawhana dako kaayog gikatabang nako hangtod karon kay pareho ra mig mga lingaw.

Dinhi nako naamguhan nga kon duna diay pultahan nga tak-upan, dunay laing buksan.