Dust in the wind
Di ko man sab mabasol si Kier kon nakagustog babaye nga tinud-anay gyud. Ako bitaw, sa akong pagfourth year sa hayisol kaniadto, nahigugma na man ko. Sa akong nabatyagan sa akong kaugalingon, true love gyud ang gibati ko niya. Apan laing girl ang iyang nagustohan, friend nako ang babaye. Nagkarelasyon gyud sila.
Mora kog gipatay niadtong higayona. Usahay maghilak ko sa tago tungod sa kaguol. Gisakitan gyud ko sa pagkapakyas sa akong unang gugma. Apan sa ngadto-ngadto na, naka-move on ra gihapon ko kay gihunahuna ko nga di kami para sa usag usa.
Ug dako ang akong pagtuo nga mao sab kini ang nahitabo kang Kier. Nahigugma siya sa usa ka babaye nga wa mahigugma niya ug laing lalaki ang love ani. “Tana, Kier. Mamauli na ta.” Nagsugod na sa pagsiga ang mga suga sa among palibot. “Hapit na mogabii.”
Igo lang mitando si Kier. Unya sa wa pa mi mobiya sa Plaza Independencia, mihuros ang hangin. Mitan-aw si Kier sa mga abog nga gipadpad sa hangin.
Nanghupaw si Kier. Nakapanglingo ko. Pagkadako gyud kaha sa gibating pagmahal ni Kier, no, sa babaye nga iyang gihigugma? Hilom na lang kong nakaingon.
Nagtuo ko nga modiretso na mi si Kier sa tagsa-tagsa ka boarding house nga among gipuy-an, nga magkadug-ol ra sa siyudad. Apan di man diay. Iya kong giimbetar sa pagpangaon sa usa ka fast food.
“May nang manihapon tang daan, Belinda, sa di pa ta mamauli.”
“Okay. Pero share ta sa bayad, ha.” Mipahiyom ko. Nagexpect ko nga mo-smile si Kier nako. Apan parehas sa naandan na, wa gyud siya mobawos sa pagpahiyom nako.
Na, ikaw lang, Kier, matiguwang kag dali anang imong kinaiya. Nakaingon na sab ko sa hilom.
“No. Ako ang nag-imbetar nimo, so, di ta mag-share sa bayad sa atong makaon ug mainom, Belinda. Ako lang ang mobayad.”
Mipakibo na lang ko sa akong mga abaga. Wa na lang ko magtingog. Si Kier mismo ang nag-order sa counter samtang ako naglingkod na sa bakanteng lamesa.
Ug samtang nangaon na mi, nagsigeg tan-aw si Kier sa babaye ug lalaki nga sweet kaayo samtang nangaon di layo sa among gilingkoran.
(SUMPAYAN)