GUGMA NGA BUNGA SA SUNGOGSUNGOG
Nagsugod sa sungogsungog ang sugilanon sa gugma nila ni Jhun Carlo MalicseCarnice ug Karla Bermudo-Carnice.
Sa unang pagkakita pa lang ni Carlo kang Karla niadtong Hulyo 2016, nabihag na kini sa kaanyag sa dalaga hangtod nga iyang gipangulitawhan ug giminyoan.
Nahimamat ni Carlo si Karla sa unang adlaw sa iyang trabaho isip copy specialist sa Sun. Star Cebu diin si Karla nagtrabaho usab isip copy editor sa S Magasin ug Batang Bisdak, igsuong mantalaan sa Superbalita Cebu.
Isip bag-ong empleyado, gipailaila si Karlo sa ubang mga trabahante sa lainlain nga departamento sa Sun.Star Publishing Inc. hangtod nga naabot siya sa departamento ni Karla ug iya kining nailaila.
Si Carlo niangkon nga naibog na siya sa dalaga niadtong higayona hangtod nga kanunay na sila nga sungogon.
Niabot ang panahon nga nanghagad na og date ang lalake sa dalaga ug matag gabii na kini niya nga ihatod sa gipuy-an niini.
Human sa duha ka semana, nipadayag na kini sa iyang pagbati ngadto kang Karla.
Si Carlo nagdako ug nigradwar sa kolehiyo sa lungsod sa Ubay, lalawigan sa Bohol, diin iyang gidala si Karla ug gipailaila sa iyang mga ginikanan.
Ang duha opisyal nga nag- kauyab sa ilang pagbalik sa Cebu niadtong Agusto 10, 2016.
Niadtong Pasko sa 2016, higayon na usab ni Karla nga gipailaila si Carlo sa iyang mga ginikanan ug mga igsuon.
“On the spot, nauyonan dayon siya sa akong parents,” saysay ni Karla.
Niadtong Pebrero 2017, ni-propose si Carlo kang Karla uban sa tabang sa ilang mga higala sa Circulation ug Marketing Departments sa Sun.Star.
Si Carlo nangurog kay gikulbaan ug wa makapugong sa iyang mga luha dihang gipangayo ang matam-is nga “Yes” ni Karla atubangan sa ilang mga higala.
“Wa ko magdahom maako siya kay crush siya nako sa una,” pag-angkon ni Carlo.
Ang duha nagpakasal niadtong Disyembre 28, 2017 sa Our Lady of Sacred Heart Parish (Capitol Parish), dakbayan sa Sugbo. /