300 KAPIN KA BALAY NAUGDAW
P3 M DANYOS SA SUNOG SA PASIL
Naugdaw ang di-mominos 300 ka mga balay nga gipuy-an sa gatusan ka pamilya sa tulo ka mga sityo sa Barangay Pasil, dakbayan sa Sugbo, diin ang sunog giisa sa mga bombero ngadto sa general alarm. Si Fire Supt. Ronaldo Orbeta, assistant regional director for operation, nagkanayon nga nadawat nila ang alarma alas 12:26 sa udto ug paglabay sa 18 minutos ila kining giisa ngadto sa task force alpha sanglit nag-anam kadako ang kayo.
Giisa ngadto sa task force bravo ala 1:08 ug paglabay sa 14 minutos giisa ngadto sa general alarm diin ang tanang fire trucks sa lalawigan giawhag sa pagresponde gumikan sa kadako sa kayo.
Hinuon nakontrolar sa mga bombero ang sunog alas 2:54 sa hapon ug sa pasiuna nilang imbestigasyon usa ka bata ang nagduwa sa pusporo nga maoy hinungdan sa sunog.
Giingong didto nagsugod ang kayo sa balay nga gipanag-iya ni Ely Petalcorin ug dali rang nikatap ang kayo sa silingang mga balay sanglit ginama ra kini sa light materials sa sityo Lawis riverside, Sunok ug Lawis Puthawan.
Ang mga bombero nibanabana nga moabot ngadto sa P3 milyones ang danyos sa maong sunog diin adunay
party sa iladong eskwelahan sa maong lugar ang nakan-an sa kayo.
Ang Department of Social Welfare and Service nagkanayon niabot na og 272 ka pamilya kon 1,314 ka individual ang ilang nalista hangtod alas 7:45 kagabii.
Gihulagway ni Lea Ouano-Japson, pangulo sa DSWS nga gitagaan na usab nila og libreng pagkaon kagabii ang gatusan ka mga indibidwal nga kasamtang gipahiluna sa covered court sa barangay nga molanat hangtod tulo ka adlaw.
Matod pa ni Japson nga modaghan pa ang mga pamilya nga apektado sanglit nagpadayon pa og lista ang DSWS ug human niini ila kining ipaubos sa re-validation.
Kini magsilbi nga preparasyon sa pagpanghatag unya sa City Government og P20,000 nga financial assistance ngadto sa mga tag-iya og balay ug laing P10,000 ngadto sa mga renter.
Posibleng ugmang adlawa, ang City Government mohatag og family kit diin anaa didto ang mga batakang panginahanglan al;ang sa pamilya ug aron usab sila makakaon sulod sa pipila ka adlaw samtang dili pa sila makabalik sa pagpuyo sa ilang lugar nga nasunogan. /