APAS MIDAOG SA SINULOG SA BARANGAY SA DAKBAYAN

Gilangkat sa Barangay Apas ang kampiyonato sa Sinulog sa Barangay sa Dakbayan isip tipik sa Sinulog 2018 kagahapon.

Ang Apas nga gidumala sa Barangay Mayor’s Office maoy nipatigbabaw sa laing 20 ka mga barangay nga nisalmot sa Sinulog sa Barangay nga gipahigayon didto sa Cebu City Sports Center.

Sila maoy nakakuha sa P350,000 nga ganti samtang nahimutang sa ikaduhang dapit ang Barangay Basak San Nicolas (P300,000) nga girepresentahan sa Lumad Basakanon kinsa maoy kampiyon sa street dancing (P50,000) ug best in musicality (P50,000).

Gilangkat sa Tribu Mabolokon sa Barangay Mabolo ang ikatulong dapit (P250,000) nga second placer sa best in musicality (P30,000), ikaupat ang Barangay Guadalupe (P200,000) ug 5th placer ang Barangay Labangon (P150,000) nga 4th placer sa best in musicality ug nakakuha sa best in costume (P50,000).

Ang mga nidaog ug wala nidaog sa Sinulog sa Barangay sa Dakbayan pulos makasalmot sa Sinulog Grand Parade karong Enero 21.

Gihatagan og gibug-aton sa Barangay Apas-BMO atol sa ilang pagsayaw ang kabililhon ug simbolo sa kandila aron mapabot ang mga pangaliya.

Si George Villamor Jr., choreographer sa Apas-BMO, nagkanayon nga naglisod sila sa financial nga aspeto apan ang tanan gisalig sa Balaang Bata.

“Among gipakita unsa ang importansiya sa pagpanagkot. Unsa ka importante ang kandila nga maoy atong gigamit sa pagpanagkot sa simbahan. Pinaagi sa kandila nga atong gigamti sa pagpangaliya kang Snr. Sto. Niño ug sa mga santos nato isip pasalamat," matod ni Villamor.

Kahinumduman nga gipalagpot ni Mayor Tomas Osmeña ang sakop sa BMOApas nga nag-solicit ngadto sa mga kompaniya nga sakop sa Apas.