Tubo sa tubig mibuto hinungdan sa trapik sa Carcar
NIbuto ang tubo sa tubig samtang gitrabaho sa contractor sa Department of Public Works and Highways ang karsada sa boundary sa Barangay Perrelos, dakbayan sa Carcar hinungdan nga wa paagii og mga sakyanan ang outer
lane sa karsada nga niresulta sa pagkatanggong sa mga sakyanan sud sa pipila ka oras niadtong Sabado.
Kini nga hitabo niresulta sa pagkalangay sa mga biyahe sa mga bus ug minibus ug pagdasok sa mga pasahero sa Cebu South Bus Terminal nianang gabii, base sa gi-post nga mga hulagway ni Jonathan Tumulak, security management head sa terminal.
Ang opisyal sa DPWH ug si Carcar City Mayor Nicepuro Apura nangayo og despensa ug pagsabot sa publiko bahin sa nahitabo.
Si Engr. Leslie Anthony Molina, pangu sa 2nd Engineering District sa DPWH Cebu, nipasabot nga samtang nagkawot ang mga tawo sa ilang
contractor, nasabod ang tubo sa tubig ug kini nibuto.
“Pag-compact sa dalan, wala mabantayi nga mababaw diay ang tubo sa ilawom maong nibuto,” asoy ni Molina sa pakighinabi sa Superbalita Cebu kagahapon.
Matod niya kini ang hinungdan nga wala paagii ang outer
lane paingon sa habagatang bahin, nga mao unta ang nauyonan nga paagian samtang magpadayon ang pagtrabaho. Tungod sa hitabo, matod ni Molina, ang outer lane na lang sa karsada nga paingon sa siyudad sa Sugbo ang gipulipulihan og agi sa mga sakyanan nga nagpaingon sa south ug nagpadung sa dakbayan sa Sugbo.
Si Molina namahayag nga nisamot ang kahuot sa dagan sa trapiko kay nagkasugat na ang ubang mga sakyanan kay ang ubang mga drayber nag-iyahay na og lusot hinungdan nga nangatanggong.
“Nagsugat-sugat na kay wala nay ni-give way maong nalangay. We ask apology and understanding sa traveling public, wa mi mag-expect,” dugang sa district engineer. / SCG