Real property tax pasakahan sa Kapitolyo

Pasakaan sa kagamhanan sa lalawigan sa Sugbo ang bayranan sa real property tax (RPT) ug ubang buhisan sa higayon mausab na ang Provincial Revenue Code karong tuiga.

Si Provincial Treasurer Emmanuel Guial nibutyag nga nag-finalize na sila karon sa draft alang sa pag-amendar sa siyam na ka tuig nga Ordinance No. 2008-10 kun Revenue Code of Cebu 2008.

Iyang giklaro nga way kalambigitan niini ang Tax Reform for Acceleration and Inclusion (TRAIN) Law nga gipatuman sa nasudnong kagamhanan.

Si Guial nipasabot nga ubos sa Republic Act 7160 kun Local Government Code (LGC), ang mga local government unit gitugtan nga makapasaka sa RPT ug ubang buluhisan sa matag lima ka tuig pinaagi sa ipalabang nga ordinansa sa konseho o Sanggunian.

“Magkinahanglan ta og ordinance increasing the rate of real property tax which the province is now drafting. Nagdraft ta kay more than five years naman ta,” sumala sa opisyal sa pakighinabi sa Superbalita Cebu.

Siya nitug-an nga 10 porsiyento ang ilang gi-propose nga umento sa RPT ug ubang buhisan nga ubos sa Revenue Code of Cebu.

“Naay provision ana nga limited lang ta up to 10 percent sa Local Government Code on taxes. 10 percent ang atong gi-propose kay mao man nay limit,” dugang pagpasabot ni Guial.

Siya niangkon nga wa sila makapaumento sa buhisan niadtong 2012 kay wa nila maandam ang draft.

Apan niadtong 2015, dunay gihimo nga amendments sa amusement tax samtang pagka 2016 duna usab amendments sa bayranan sa sand and gravel.

Tinguha nila nga mahan-ay ang draft karong buwana aron iduso ngadto sa Provincial Legal Office alang sa review.

“Then the governor mo-endorse sa SP (Sangguniang Panlalawigan) for promulgation and enactment of the ordinance,” dugang ni Guial sa Superbalita Cebu

Niadtong 2017, misaka og 18.66 porsyento ang koleksyon sa real property tax nga niabot og P74.5 milyones kon itandi sa P62.8 milyones.

Ang pagsaka sa RPT mausab sa giktakda nga pagtubo sa presyo sa serkado.