Tungod sa suyop?

Dunay dili pa kompirmadong taho nga ang dakong sunog sa tulo ka mga sityo sa Barangay Pasil, dakbayan sa Sugbo kagahapon sa hapon nagsugod sa balay gidudahang drug den o suyopanan. Gidudahan nga tungod sa pagsuyop sa gidiling drugas nga shabu miulbo ang dakong sunog. Ang Pasil, daghang squatters nga namuyo, naila nga usa sa mga dapit sa dakbayan nga dunay kalihokan sa gidiling drugas.

Pastilan, kon tinuod ang maong taho bahin sa sinugdanan sa sunog, naamong lang intawon ang ubang kabalayan nga gipuyan sa nagtinarong sa lumolupyo sa barangay. Apan mabasol usab kamo og gamay bahin sa sunog tungod sa pagpakahilom sa natikdan nga drug den sa dapit. Kon nitaho sa awtoridad, posibli nga nasanta ang panghitabo. Ang pagsuyop dili lang makadaut sa pangutok apan risgo usab sa halapad nga kadaut, sama sa nahitabong sunog.

Apan nahitabo na. Himuon na lang nato kini nga leksiyon labina sa mga susamang dapit diin kusog ang tago nga kalihokan o negosyo sa gidiling drugas nga moabag sa awtoridad ug sekretong motaho bahin sa inyong namatikdan nga dautang kalihokan sa inyong palibot. Pwede kamong dili magpaila apan mohatag og sekretong tips aron masusi sa awtoridad ug mahimoan og aksiyon.

Ug dili lang bahin sa druga, ang tanang mamatikdan dautang lihok sa palibot magpakabana kita labi na ning panahon nga nagtumaw kanunay ang hulga sa terorismo. Sagad sa mga dautang tawo o grupo ug nagnegosyo sa gidiling drugas anha magtago sa squatter’s area ug moipon sa mga kabus aron lisod mailhan sa awtoridad.

Mao kini ang hinungdan nga importante kaayo ang pagtisipasyon sa komunidad sa pagbantay sa seguridad ug ang pagpatunhay sa kahusay ug kalinaw. Sa imong yano nga pagpakabana, liboan o minilyon nga kinabuhi ang mapanalipdan. Kita nga mahigugmaon sa kalinaw, andam moangkon sa responsibilidad, mobarog ug pagpakabana.