Magkat-on pagsakay og motorsiklo

Nagkadaiyang sugilanon labot sa problema sa trapiko nagbaha sa social media taliwala sa daghang kalihukan nga gipahigayon nunut sa kapistahan ni Señor Santo Niño. Dunay naghisgut nga usa ngadto sa tulo ka oras sila nga nag aginod usa pa niabot sa ilang distinasyon. Dunay nangabasa kay naabtan sa ulan human nihukom nga magbaktas na lang kay sa mapasmo diha sa karsada.

Ang laing reklamo nga lisod ang pagpangita ug kasakyan ma-jeep man o taxi. Pero sa pagka tinuod naa ray daghan nga masakyan nga nagsaoy saoy sa karsada. Sana sa motorsiklo nga namasahero nga gitawag og habalhabal. Wala lang maanad ang uban natong kaigsoonan pagsakay ug habal habal, nga hangtod karon wa pa huwasi sa kahasol nga ilang nasinati samtang nga sila niapil o nisaksi sa daghang kalingawan nga gihimo sa kinapusorang bahin sa dakbayan sa Sugbo. Pananglit ang Sinulog sa lalawigan ug barangay sa miaging Sabado ug kagahapon. Daghan ang nagbagulbol kay natanggong sa karsada gawas nga dugay pa gyud naka sakay. Gahapon sa gabii pagka daghan sa mga napuwerhisyo tungod sa kalapad sa kahuot sa dagan sa trapiko.

Sa usa ka dakong tindahan sa South Road Properties nga akong nasuroyan kauban ang akong pamilya, hapit na lang magtungang gabii sa akong pagbiya daghan pang pasahe- ro ang nagpaabot ug masakyan sa sulod ug sa gawas. Ang kahuot sa trapiko usa sa gibasol pun-an pa sa pagbunok sa ulan nga way tihik tihik nganong nihit kaayo taxi. Wa biya’y ruta sa jeep ang maong tindahan.

Samtang nagpaabot ko sa akong hugala nga akong gihangyo nga mokuha namo didto, naniid ko sa palibot. Mao ni ang akong nadiskubrehan. Dunay daghang habal habal sa gawas nga nanghakot ug mga pasahero. Kasagaran may dala nga kapoti ang mga driver. Ang kasagaran sab sa ilang mga pasahero mao kadtong nagtrabaho sa maong tindahan ug diha sa’y daghang shoppers nga sa akong tan-aw anad na sab pagsakay ug motorsiklo.

Diha’y magtiayon nga taga Labangon, Cebu City ang akong napaminawan nga nakigsabot sa drayber sa habalhabal sa plitihan. Abi nako og dayon nato apan nilakaw man. Akong gipangutana ang drayuber. Matod sa drayber, nagkasabot na sila sa plitihan ang problema kay nagduha duha ang magtiayon kay wa pay kasinatian pagsakay og habalhabal. Giingnan ko sa drayber nga siya na nihukom nga di nalang kay lisod ang pagpasakay niadtong way kasinatian o di hanas kay hadlok siya nga makasugat ug problema. Lisod kung mopasakay ka og pasahero nga wa gyu’y kasinatian niining habalhabal. Di sab na sayon alang sa drayber sa pagsige og pugong sa manobela.