Dust in the wind

Gipasagdan ko na lang si Kier nga nagsigeg tan-aw sa babaye ug lalaki nga loving kaayo samtang nangaon duol sa among nahimutangan. Klaro nga naibog si Kier sa ka-sweet sa duha. Tingali, duna siyay nahinumdoman sa iyang kagahapon uban sa babaye nga love gyud niya.

Mipadayon kog kaon. Mipakibo na lang ko sa akong mga abaga dihang nanghupaw si Kier ug wa na magtan-aw sa lalaki ug babaye nga klarong managhigugmaay. Mipadayon pagkaon si Kier. Usahay, mopasiplat ko niya, ug may mga higayon nga magkasugat ang among panan-aw kay mopasiplat man sab siya nako.

“What’s next, Kier. I mean gikan dinhi asa man ta?”

Miinom ko sa softdrinks sa akong baso nga may straw. Igo lang mipasiplat si Kier nako. Miinom sab siya sa iyang softdrinks. Unya mipadayon pagkaon.

“Mamauli na ta, Belinda. Aw, it’s up to you. Basig gusto ka pang mosuroy.”

“Di na lang, Kier. Gikapoyan na ko.”

Pagkahuman namog pangaon, namauli na mi si Kier. Naglakaw lang mi kay walking distance man lang ang gilay-on sa gisak-an namong boarding house gikan sa among gikan-an sa downtown. Gihatod ko ni Kier sa akong gipuy-an. Kutob ra siya sa silong kay estrikto ang among landlady, di mi padawaton og bisitang lalaki kon gabii na.

“Gudnayt, Kier.” Nindot ang akong smile niya. Nagpabiling seryuso si Kier. Kanus-a kaha ko makakita niya nga mopahiyom, no? Hilom kong nakaingon.

“Good night, too, Belinda.” Mao ra to ang gisulti ni Kier. Mbiya dyon siya nako. Gisundan ko siya sa pagtan-aw hangtod nga nakasulod na siya sa gipuy-an niyang boarding house. Malantaw lang ang gipuy-an ni Kier gikan sa akong gipuyang boarding house. Nanghupaw ko nga misulod. Katulgon na ko.

Gitan-aw ko ang akong wrist watch, nine in the evening. Sa ingon aning orasa ko matulog.

Pagka ugma kay klase na man sab, sayo kong nagmata. Pagkahuman kog kaligo ug makailis, miadto na ko sa eskuwelahan. Apan sa wa pa ko mosulod sa eskol, mihapit una ko sa suki kong karenderya nga diha ra sab sa duol aron sa pagpamahaw. Pagkahuman kog kaon, nagdali kong miadto sa eskuwelahan.

Nakita ko si Kier nga dunay gikaestorya sa selpon. Morag naghilak si Kier.

(SUMPAYAN)