GSW NAKAIPSOT
Nakaipsot ang defending champions Golden State Warriors sa makapakurat nga rally sa host Toronto Raptors aron iposte ang 127-125 nga kadaugan kagahapon atol sa pagbalik og duwa ni Stephen Curry sa National Basketball Association (NBA).
Ang Warriors nakaposte og 27 puntos nga labaw apan sa hinayhinay gikitkit kini sa Raptors ug sa wala damha, ningkulbahinam ang duwa.
Gipangulohan ni Kay Thompson ang kadaugan pinaagi sa iyang 26 puntos, nidugang og 25 puntos si Kevin Durant samtang si Curry, kinsa sulod sab sa duha ka mga duwa nga wala nakapakita og aksyon, mitampo og 24 puntos sa iyang pagbalik.
Ang Raptors gipangulohan ni DeMar DeRozan pinaagi sa iyang 42 puntos, nihatag og 17 puntos si OG Anunoby samtang niamot og 14 puntos si Serge Ibaka.
Ang Warriors ningpabuto og 16-2 run sa pagsugod sa 2nd quarter nga nakahatag kanila og kahigayunan alang sa 81-54 nga labaw sa halftime.
Apan wala dayon moisa sa ilang bandera ang Raptors hangtod nga nakasikit sila pagbalik, 115-116, sa nahabiling 3:52 minutos.
Ning higayuna, lahi na ang dagan sa kombati ug naghinugtanay na og bakus ang duha ka mga kampo hangtod na sa katapusang gutlo.
Ang jumper ni Durant maoy nakahatag sa Warriors og 125122 nga labaw sa nahabiling 21 segundos.
Wala na buhii sa Warriors ang maong labaw hangtod na sa pagkapupos sa oras.
Sa laing bahin, mibalik na sab og duwa si Kawhi Leonard ug nagpakatap kini og 19 puntos aron tabangan ang host San Antonio Spurs sa pagmakmak sa Denver Nuggets, 112-80.
Nidugang og 18 puntos si Dav9s Bertans alang sa kadaugan samtang niamot og 15 puntos si LaMarcus Aldridge.
Ang Nuggets gipangulohan ni Nikola Jokic pinaagi sa iyang 23 puntos samtang nitampo og 18 puntos si Gary Harris.
Sa laing mga duwa, ningdaog ang Los Angeles Lakers batok sa Dallas Mavericks, 107-101 (OT), LA Clippers batok Sacramento Kings, 126105, Oklahoma City Thunder batok Charlotte Hornets, 10191, Washington Wizards batok Brooklyn Nets, 119-113 (OT), ug Chicago Bulls batok Detriot Pistons, 107-105.