10 KA SAKYANAN GABANGGA SA TUNNEL
Nagdinumbolay ang siyam ka mga sakyanan ug usa ka motorsiklo human giuna og rumbo sa prime mover nga nagkarga og 40-footer container van sa tunnel paingonsa South Road Properties (SRP).
Si Nagiel Bañacia, pangulo sa City Disaster Risk Reduction and Management Office (CCDRRMO) nagkanayon nga siyam ka mga biktima ang nadala sa tambalanan, tulo niini ang nakahiagom og grabeng injury.
Sa kasayuran nga nakutlo ni Bañacia, ang prime mover nga adunay plate number GXC-388 nga gimaneho ni Toytoy Tulag nawagtangan nang daan og
brake didto pa lang sa viaduct. Nag-aginod na ang higanteng truck dihang nisulod sa tunnel ug didto nidumbol sa taxi nga adunay plate number YLH-755 nga maoy nakabaton og grabeng danyos.
Ilang gihulagway nga nibalitok pa ang ang awto sa kakusog sa impact.
Ang daghang mga tawo nga naapektuhan mao ang sakay sa van nga gipanag-iya sa catering services nga gimaneho ni Mark Anthony Lopez nga dunay unom ka mga kauban nga daling gidala sa Cebu City Medical Center.
Hinuon gipadayag ni Bañacia nga way namatay sanglit dali usab nakaresponde ang mga paramedics gikan sa Emergency Medical Service nga iya sa City Governemnt. Ilang gikauban ang mga
rescuer gikan sa Bureau of Fire Protection kinsa adunay kumpletong kahimanan sa pagluwas og kinabuhi human dunay napasok sa ilang giluwanan nga sakyanan.
Dunay awto nga grabeng naguba sanglit nadumbol sa L300 van nga niigo sab sa luyong bahin sa truck de karga nga nagkarga og semento.
Adunay usa ka motor nga naapil, apan nakalayat ang
driver ug sakay. /