AYALA MALL MOABLI KARON

DUNA NAY GO SIGNAL SA BFP; DAPIT SA METRO DI PADUOLAN

Gimingaw ka ba og laag sa Ayala Center Cebu human sa dul-an duha ka semana kining gisirhan?

Matambalan kini karong adlawa kay sumala sa pahibawo sa management sa mall, ila nang ablihan ang ilang tibuok shopping center ug kan-anan human makuha ang mga tipaka sa sunog, nalimpyo ang lugar sa nahitabong trahedya.

Kini human usab nitugot na ang Bureau of Fire Protection (BFP) sa pagbukas og balik sa mall human sa mga inspeksyon.

Apan di paduolan sa publiko ang dapit sa Metro Ayala nga maoy nasunog.

Si Atty. Jeanette Japzon, corporate communications manager sa Ayala Land Inc., nagkanayon nga mangabli ang Ayala Mall sugod alas 9 karong buntag hangtod alas 9 sa gabii.

Iyang gipadayag nga ang di maduolan sa mga shoppers mao ang lugar diin nagagikan ang sunog niadtong Enero 5 nga nahitabo sa building nga giabangan sa Metro samtang ang mall adunay lahi building.

“We are thankful to be able to welcome and celebrate with the community in time for the fiesta Señor. We missed you. See you soon!,” matod sa post sa Facebook page sa Ayala Center Cebu.

Si Cebu City Fire Marshal Noel Nelson Ababon nagkanayon nga nahatagan na nila og certification ang Ayala Center Cebu aron makaabli og balik para makapadayon sa ilang operasyon ug makabalik ang mga tenant.

Matod pa ni Ababon nga niduso na usab og report ang management may labot sa structural safety sa ilang mall.

Sa ilang pakisusi, ang kalig-on sa tupad nga building sa Ayala mall wala maapektuhi sa pag-igo sa sunog sa Metro Ayala. /