Kanhi mayor gidakop sa pulis, mipiyansa
Gidakop sa kapulisan ang kanhi mayor sa Aloguinsan, Cebu mga ala 1:30 sa hapon kagahapon tungod sa giingong iyang kalambigitan sa anumalusong pagpalit og mga food supply sa 2018.
Si Augustus Caesar Lim Moreno, 55, nasikop sa team nga gipangulohan ni Insp. Sigmund Freud Cruz, hepe sa kapulisan sa lungsod, sa iyang pinuy-anan sa Barangay Poblacion, Aloguinsan.
Ang kapulisan ni-serve sa warrant of arrest sa kalapasan sa Section 3 (e) ug (h) sa Republic Act (RA) 3019, kun Anti-Graft and Corrupt Practices Act.
Ang warrant giisyu ni Associate Justice Rafael R. Lagos, Sandiganbayan Fifth Division chairperson.
Ang kinatibuk-ang piyansa nga gitakda alang kang Moreno nikabat og P60,000 alang sa temporaryong kagawasan.
Si Cruz, sa usa ka phone interview, niingon nga kagahapon nakadawat sila sa warrant of arrest kagahapon sa buntag.
Si Moreno wa mosukol ug nipiyansa sa Toledo City Regional Trial Court human siya gidakop.
Si manlalaban Inocencio de la Cerna Jr., tigpamaba ni Moreno, niingon nga ang kanhi mayor nag-atubang og kaso sa Sandiganbayan tungod sa giingong pagkalambigit sa irregular nga 28 ka mga pagpamalit og pagkaon gikan sa AVG Bakeshop nga moabot og P282,725.
Ang asawa ni Moreno nga si Cynthia mao ang bugtong tagiya sa bakeshop.
Sila si Cynthia, usa usab ka kanhi mayor sa lungsod, ug laing lima ka mga opisyal, gipasakaan sa File Investigation Office sa Ombudsman Visayas, human masuta sa imbestigasyon nga ang mga transaksyon nakadaut sa kagamhanan ug nakabenepisyo ang bakery ni Cynthia.
Matod ni de la Cerna nga ang AVG Bakeshop gibaligya ngadto sa usa ka Lyn Tojeno sa 2007, apan si Tojeno napakyas sa paghikay sa mga dokumento nga magbalhin sa pagpanag-iya ngadto sa iyang ngan.
“I have talked to former mayor Moreno. He said he will face the trial,” nagkanayon si de la Cerna.