MOATUBANG SA CHR ANG 2 PULIS

Andam atubangon sa duha ka mga pulis sa Talisay kinsa nakapusil patay sa usa ka registered nurse ang imbestigasyon sa Commission on Human Rights (CHR).

Una niini usa ka Michelle Jeff Gabutan, 32, ang napusilan ni PO1 Erwin Denila samtang usa ka PO1 Romanito Dinapo maoy nagsilbing back-up.

Giingong nagpabuto sa iyang armas ang biktima sud sa usa ka kan-anan sa dakong mall sa barangay Tabunok.

Sa dihang nirespondi ang mga pulis napusilan kini ug namatay pag-abot sa Talisay Disitrict Hospital.

Ang uyoan nga si Konsehal Raul Cabanero kinsa maoy presidente sa Association of Barangay Council miingon nga modangop sila sa CHR aron matino kon sakto ba ang gihimo sa kapulisan kon nasubay ba sa gitawag og rules of engagement ingon man maximum tolerance.

Ang duha ka pulis nagdumili na pag-atubang sa mga tigbalita.

Apan mitataw nga andam nilang atubangon ang bisan unsang imbestigasyon sanglit sila nagtuo nga wa silay nahimong sayop.

Si P/Supt. Jason Villamater, pangu sa kapulisan sa Talisay, miingon nga katungod usab kini sa pamilya sa biktima.

Gani ila kining gihangop aron masuta usab kon sakto ba ang gihimo sa iyang mga sakop.

Gani sila mismo aduna may himuong imbestigasyon sa matag hitabo kon maglambigit na sa kapulisan.

Hinuon gikalipay usab ni Villamater ang pagdangop sa CHR sa pamilya aron mahatagan usab og higayon ang mga pulis nga makapanalipod sa ilang kaugalingon.

Kagahapon si Villamatger ug Cabanero nagkakita apan wa kini mohisgot sa ilang pagdangop ngadto sa CHR.

Usa lang sa ilang gituki mao ang pagpahugot sa seguridad sa mga mall nga di kini malutsan og armas sa ilang mga customer.

Sa iyang bahin si Cabanero nagdumili na pagpa-interview tungod kay ila nalang paabuton ang resulta sa inbestigasyon unya sa CHR.