Migamay ang kaso sa dengue sa Sugbo sa tuig 2017

Halos katunga ang pagminus sa ihap sa kaso sa dengue sa probinsiya sa Sugbo sa tuig 2017.

Sa pagtapos usab sa miaging tuig, ang siyudad sa Talisay gihapon ang nag-una sa labing daghang kaso sa maong makamatay nga sakit sa tibuok lalawigan.

Sa talaan sa Provincial Health Office, anaa sa 4,912 ang dengue cases sa probinsiya sa Sugbo sa tuig 2017.

Halos katunga ang pagminus niini kon itandi sa 9,063 ka mga kaso sa maong sakit nga natala niadtong tuig 2016. Sa tuig 2016 gideklarar ang dengue outbreak sa lalawigan.

Gitug-an sa dengue coordinator sa PHO nga si Cyril Pangatungan nga niabot og 74 ang nakalas sa dengue niadtong tuiga samtang sa miaging tuig anaa lang kini sa 47.

Dugang niya nga sa 2017, nigamay usab ang dengue cases nga natala.

Gikan sa 984 sa buwan sa Enero, niubos na kini sa 259 sa buwan sa Disyembre.

“This year (2018), palig-unon nato ang (dengue) program gihapon. Am-a na gyud gibuhat is naa na mi whole year nga awareness (program),” sumala ni Pangatungan.

Ang siyudad sa Talisay naguna sa mga dapit sa probinsiya nga nitala og labing daghang dengue cases sa miaging tuig nga miabot sa 489.

Matod ni Pangatungan nga ang hugaw nga palibot sa mga slum area sa Talisay maoy ilang gidudahan nga hinungdan sa daghang dengue cases sa dapit.

Gipasabot ni Pagatungannga angayng magbaton og igong responsibilidad ang mga molupyo alang sa regular nga pagpanlimpyo sa ilang dapit.

“Ang mga tawo pud, di manglimpyo,” niingon siya.

Nagsunod sa Talisay sa labing daghan ug dengue cases sa miaging tuig ang Consolacion nga may 394, ikatulo ang Danao City nga may 296, ikaupat ang Argao nga may 292 ug ikalima ang Toledo City nga may 275 dengue cases.