Dokumento nangabasa

Gipaneguro ni Mandaue City administrator Danilo Almendras nga di maapektuhan ang mga sweldo sa mga kawani sa City Hall human nangabasa ang mga dokumento sa City Budget Office, Commission on Audit (COA) ug sa City Accounting Office.

Niadtong Lunes sa hapon, si Almendras nagkanayon nga may nigamit sa washroom sa accounting office sa 2nd floor sa annex building sa City Hall ug wa niini pagnga ang gripo.

Ang pag-agas sa tubig nagpadayon hangtod Martes sa buntag didto na nadiskubre sa mga kawani ang insidente.

“Wa mapawng ang tubig gikan alas singko sa hapon hangtod gabie, kadlawon ug buntag, nagsige og agas ang tubig maong nagbaha sa silong. Ang volume sa tubig kusog, niawas, niya ni-spread sa tibuok floor sa accounting then ninaug sa COA and Budget, grabe kaayo ang volume sa tubig,” matod ni Almendras dihang nahinabi sa Superbalita Cebu.

Dugang niya nga gawas sa mga importanteng dokumento, lakip sa mga nangabasa ang mga ekipo, furnitures, computers ug uban pa.

Nasuta ning mantalaan nga ang tubig sa 2nd floor nibanaw sa kisame sa first floor diin nahimutang ang City budget office ug COA.

“Ang COA ra ba they are in the midst of preparing their audit report, naa man nay period nga ilang tumanon nga what date sa February mo-submit na sila sa report,” dugang ni Almendras.

Sa kasamtangan, anaa sa nag-opisina ang city budget office duol sa buhatan sa mayor sa City Hall samtang ang COA atua nagbuhatan ibabaw sa usa ka fastfood chain sa Centro.

“Di ma-affected ang payroll sa mga empleyado mao bitaw nga we have to set up new office aron makapadayon sila sa transactions,” pahibawo ni Almendras.